Mınıstrdiń aıtýynsha, ótken jyldyń alǵashqy toqsany Memleket basshysynyń shetelderge jemisti saparlarymen, mańyzdy kelisimdermen, halyqaralyq deńgeıdegi kelissózdermen erekshelengen. Eldiń bedelin aıshyqtaıtyn osyndaı aýqymdy jumystardyń arqasynda Qazaqstannyń úni halyqaralyq alańdarda neǵurlym kóbirek estilip, Qazaqstan álemdik qoǵamdastyqtyń turaqty jáne uzaqmerzimdi seriktesi retinde tanyla túsýde.
Q.Ábdirahmanov byltyrǵy alqa májilisinde Syrtqy ister mınıstrligine Elbasy birqatar tapsyrmalar júktegenin eske aldy. Sonyń ishinde syrtqy saıasattyń ekonomıkalyq vektoryn damytý, vedomstvonyń ınvestısııalyq jáne eksporttyq baǵyttaryndaǵy qyzmetin qaıta formattaý, jahandyq básekelestik jaǵdaıynda elimizdiń syrtqy ekonomıkalyq múddelerin qorǵaý syndy mańyzdy mindetterdi júzege asyrý tapsyrylǵan. Buǵan qosa, merıtokratııa qaǵıdattaryna negizdelgen kadrlyq saıasatty jetildirý, syrtqy rotasııany josparly júrgizý, qyzmetkerlerdiń kásibı deńgeıin arttyrý máseleleri de nazardan tys qalmaı, osyǵan oraı mınıstrlikte kóptegen jumystar eńserilipti.
Al bıylǵy alqa májilisiniń kún tártibinde tórt másele qaraldy. Onyń birinshisi – Prezıdenttiń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýynda aıtylǵan tapsyrmalardy iske asyrýdyń joldary bolsa, ekinshisi – Memleket basshysynyń bastamalaryn BUU arqyly ilgeriletý máseleleri. Úshinshisi – «Sıfrly Qazaqstan» memlekettik baǵdarlamasyn iske asyrý sheńberinde vedomstvolyq aqparattyq júıeni ázirleý jáne engizý bolsa, kún tártibinde qaralǵan tórtinshi másele boıynsha byltyrǵy jumys qorytyndysy qanshalyqty deńgeıde atqarylǵany talqylandy.
Negizgi baıandamany jasaǵan Qaırat Ábdirahmanov Joldaýda Prezıdent elimizdiń tehnologııalyq, sıfrly jáne ónerkásiptik damýyn jedeldetýge baǵyttalǵan on negizgi mindetti belgilep bergenin atap ótti. «Elbasynyń Joldaýynda atalǵan barlyq aspektilerdiń Syrtqy ister mınıstrligine tikeleı qatysy bar. Sebebi bul sheteldik áriptesterdi, ınvestorlardy, halyqaralyq tájirıbeni elimizge tartýmen tyǵyz baılanysty. Biz memleket damýyndaǵy mańyzdy mindetterdi iske asyrý barysynda Qazaqstannyń ǵana emes, shetelderdiń de áleýetin, resýrstaryn tolyqqandy paıdalanýymyz kerek», dedi mınıstr.
Indýstrııalandyrýǵa baılanysty qolǵa alynǵan jumystarǵa toqtalǵan Q.Ábdirahmanov ortalyq jáne jergilikti memlekettik organdarmen, ulttyq kompanııalarmen birlese otyryp, ınvestısııalar tartý jónindegi ózara is-qımyl tártibi qabyldanǵanyn, yntymaqtastyq týraly memorandýmǵa qol qoıylǵanyn, birlesken aqparattyq-túsindirme jumystarynyń jospary bekitilgenin atap ótti. Mundaı jumystar byltyr da qolǵa alynyp, elimizde sheteldik mekemelerdiń qatysýymen jalpy somasy 3 mlrd AQSh dollaryn quraıtyn 30 joba iske asyrylǵan eken.
Resýrstyq áleýetti odan ári damytý boıynsha mınıstrlik álemdegi bedeldi elderdiń tájirıbelerin zerdelep, blokcheın sııaqty keshendi aqparattyq-tehnologııalyq platformalardy engizýdi bastaǵan. Al aqyldy tehnologııalar arqyly agroónerkásip keshenin damytý jónindegi Elbasynyń tapsyrmasyna oraı SIM qazaqstandyq aýylsharýashylyq ónimderin syrtqy naryqqa shyǵarý, agroónerkásip sektoryna sheteldik ınvestorlardy tartý jáne elimizdiń azyq-túlik qaýipsizdigin qamtamasyz etý sekildi sharalardy júzege asyrýdy qolǵa alǵan.
Qarjy sektoryn qaıta jańǵyrtý boıynsha da josparlanǵan sharýalar barshylyq. Mınıstrdiń aıtýynsha, vedomstvo jumysynyń basty basymdyqtarynyń biri – «Astana» halyqaralyq qarjy ortalyǵyn damytý jáne ilgeriletý, AHQO-ǵa qatysty qazaqstandyq delegasııalardyń shetelge saparlaryn mazmundyq jaǵynan tolyqtyrý jáne álemniń aldyńǵy qatarly memleketterindegi qarjy jáne isker toptarymen baılanysty nyǵaıta túsý. Osyǵan baılanysty mınıstrlik bıylǵy shilde aıynda Dúnıejúzilik ıslam ekonomıkalyq forýmyn Astanada ótkizýge jáne ortalyqtyń resmı ashylýyna qajetti kómek kórsetýdi kózdep otyr.
Q.Ábdirahmanov, sondaı-aq Memleket basshysy jarııa etken «Prezıdenttiń bes áleýmettik bastamasy» bıylǵy Joldaýmen úndes ekenin aıta kelip, Elbasynyń bastamalary 2015 jyldyń qyrkúıeginde BUU-nyń mereıtoılyq sammıtinde bekitilgen 2030 jylǵa deıingi kezeńge arnalǵan turaqty damýdyń kún tártibine tolyqtaı sáıkes keletinin atap ótti.
Joldaýda atalǵan tapsyrmalardy oryndaý maqsatynda mınıstrlik ishki is-sharalar josparyn bekitip, qurylymdyq bólimshelerge jáne Qazaqstannyń shetelderdegi mekemelerine sapaly mamandar daıarlaý, vızalyq resimderdi jeńildetý, týrızm salasyndaǵy kedergilerdi joıý, sheteldik kompanııa, ýnıversıtettermen yntymaqtastyq ornatý, ishki týrızmdi damytý boıynsha kómek kórsetýdi uıǵaryp otyr. Sonymen qatar mınıstr alqa májilisinde Úkimet bekitken ınvestısııalyq jáne eksporttyq strategııalardy iske asyrýǵa belsene qatysyp, ekonomıka ónimdiligin arttyrý, adamı kapıtaldy, básekelestikti damytý, bıznes ahýaldy jaqsartý baǵytyndaǵy jumystardy kúsheıtýdi tapsyrdy.
Qymbat TOQTAMURAT,
«Egemen Qazaqstan»
