Kesh baǵdarlamasyna V. A. Mosarttyń ǵajaıyp, demokratııashyl ári pálsapalyq «Sıqyrly fleıta» operasyna jazylǵan kóńildi de shýaǵyn shashqan ývertıýra endi. Dástúrli zıngshpıl janrynda jazylǵan ertegi-opera mýzykalyq teatrdaǵy eń tanymal spektaklderdiń birine aınaldy. Mánerli tásilderiniń moldyǵy, gýmanıstik mazmuny men shabytqa toly áýendiligi arqasynda shyǵarma barlyq álemdik opera sahnalarynda saltanat qurdy.
Sondaı-aq, mýzykanttar I. Gaıdnnyń № 85 sımfonııa sı-bemol majoryn usynady. Avstrııalyq klassıktiń shyǵarmashylyǵyna tabynýshylar bul týyndyny «Patshaıym» dep atap ketken, sebebi atalǵan sımfonııany fransýz patshaıymy Marııa-Antýanetta erekshe súıip tyńdaǵan. I. Gaıdnnyń mýzykasyndaǵydaı, onyń dúnıetanymynda da ómirge degen úılesimdi ári aıqyn kózqaras basym, sonyń nátıjesinde sımfonııany júıeli, beıneli, qanyq túrde ózgermes senimdilik pen jarasymdy ázil sıpattaıdy.
«Astana Opera» Sımfonııalyq orkestriniń solısi Baǵdat Ábilhanovtyń oryndaýynda V. A. Mosarttyń eń ataqty skrıpkalyq konserti – orkestrmen skrıpkaǵa arnalǵan № 5 konsert lıa major shyrqalady.
- V. A. Mosarttyń skrıpkaǵa arnalǵan besinshi konserti – kemeńger kompozıtor shyǵarmashylyǵynyń naǵyz jaýhary, XVIII ǵasyrdaǵy konsert stıliniń asqar shyńy. Týyndy ózindik ereksheligimen, ǵajaıyp qurylymymen, teatrlyǵymen, asqaq jalynymen, ásemdigimen jáne qýlyǵymen ózgeshelenedi. Biregeı úshinshi bóliginiń arqasynda konsert «Túrik» ataýyna ıe bolǵan. Sol zamandaǵy qalyptasqan «jaqsy minez erejesine» qaramastan, kerbez menýette (kóne fransýz bıi) kenetten halyq arasynan shyqqan «kóshe» keıipkeri – sol ýaqytta sánge aınalǵan «túrik» mýzykasyna eliktep, bıge basqan syǵan paıda bolady. Konserttiń sońy shyǵarmashylyq rýhtyń erkindigin madaqtaıtyn batyl serpilis boldy, - dep atap ótti Baǵdat Ábilhanov. Konserttiń bastalýy saǵat 19:00-de.
