Ronaldýǵa shapan tikken «Nur-Shah» sán úıiniń týyndylary Qazaqstanǵa keńinen tanymal, elimizde onyń ónimderin tutynatyn óner adamdary jeterlik. Qazaqtyń ulttyq naqyshy men oıý-órnekterine jańasha sán-sıpat berip, keshegi men búgindi baılanystyrý arqyly zamanaýı talǵam qalyptastyrýdy, Mańǵystaýdyń ózindik erekshe naqyshyn tanytýdy, qazaqtyń ulttyq oıý-órneginiń birinen-biri ozǵan álemdik sán tasqynynda tasada qalyp qoımaı, qoldanysqa dendeı enýin kózdegen sheber Nurjamal Nurpeıisova sán áleminde óz arman-maqsatyna qol jetkizdi deýge bolady. On jeti jyl burynǵy aıaǵyn apyl-tapyl basqan kásibi qazir órge domalap, elimizde tanymal brendke aınaldy. Búginde sán úıiniń ónimderine tek Qazaqstannyń emes, shet elderdiń turǵyndary da qyzyǵýshylyqpen suranys berip jatady.
Memlekettik qoldaýlarǵa súıenip kásibin jolǵa qoıǵan kásipker N.Nurpeıisovanyń «Nur-Shah» sán úıi Mańǵystaý oblystyq, respýblıkalyq baıqaýlarynda jeńimpaz atanyp, respýblıkalyq jáne halyqaralyq kórmelerge qatysyp, el mereıin kóterdi. Qazir Astana, Aqtaý jáne Jańaózen qalalarynda bólimsheleri bar sán úıi 50-den astam adamdy jumyspen qamtyp otyr, múgedek balalarǵa, turmysy tómen otbasylarǵa qaıyrymdylyq kómek uıymdastyrýdy da umyt qaldyrmaıdy.
Sán úıiniń ıesi Nurjamal Nurpeıisovanyń aıtýynsha, ujym qyzmetkerleri munaı kompanııasynyń Ronaldýǵa shapan tigý týraly tapsyrysy boıynsha eki aı tapjylmaı jumys istegen. Aldymen, jergilikti jáne reseılik sýretshilerdiń kómegimen on shapannyń eskızi jasalynǵan, al tapsyrys berýshilerdiń talaby boıynsha shapannyń artynda, ıaǵnı jaýyrynynda Qazaqstannyń týy, kún jáne qyran beınesi bolý mindettelipti.
Dızaınermen Aqtaýdaǵy Nazarbaev zııatkerlik mektebi oqýshylary kezdesý ótkizip, dızaınerlik álem, sán úıi jáne ataqty fýtbolshyǵa shapan tigýdiń qıyndyǵy men qyzyǵy týraly suraqtaryn qoıdy.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
