Biregeı jobany qolǵa alyp, bastama kótergen Alıanstyń ólketanýshy-etnograftar klýby bolyp otyr. Jobany júzege asyrýǵa arheologııa, ólketaný jáne etnografııa salasy boıynsha óz yqylasymen izdenip júrgen tarıhshy ǵalymdarmen birge, birneshe myń almatylyq oqýshy men stýdent te jumyldyryldy. Jas ólketanýshylar alǵashqy tabystary men áseri týraly áleýmettik jelilerde, merzimdi basylymdarda paıymdy pikirlerimen bólisip otyrady. Joba merzimi aıaqtalǵan soń jumys nátıjesi negizinde Almaty men qala mańyndaǵy tarıhı, arheologııalyq eskertkishterdiń kartasy jasalyp, «Almaty qalasy týraly 100 qyzyqty derek» atty jańa jınaq jaryq kórmek.
О́lketanýshy-etnograftar klýbynyń jetekshisi, QazUÝ-diń tarıh, arheologııa jáne etnologııa fakýltetiniń dekany Meńdigúl Noǵaıbaevanyń aıtýynsha, jobanyń maqsaty – ǵalymdardyń qoldaýymen jas býyndy Almaty qalasynyń tarıhı murasyn zerttep, zerdeleýge erte bastan baýlý. «Joba qoǵamdyq sanany jańǵyrtýǵa baǵyttalǵan «Týǵan jer» baǵdarlamasynyń mańyzdy quramdas bóligi bolyp tabylady. Biz ólketaný týraly oı men ustanymdardy oqý baǵdarlamasyna belsendi túrde engizýdi qolǵa aldyq. Sondaı-aq jastardyń boıyndaǵy otanshyldyq sezimdi oıatý maqsatynda tarıhı-ólketaný jáne etnografııalyq jumystar júrgizemiz. Al Otandy súıý degenimiz, eń aldymen óz týǵan jerińe, óz aınalańa súıispenshilikten bastalady», deıdi qanat qaǵyp otyrǵan jańa jobanyń jetekshisi M.Noǵaıbaeva.
Al Qyzdar memlekettik pedagogıkalyq ýnıversıtetiniń dosenti Álııa Isaeva óz baıandamasynda etnografııalyq mazmundaǵy saýaldama júrgizgen stýdent-eriktiler tobynyń jumysy týraly áńgimelese, Qazaq sport jáne týrızm akademııasynyń dosenti, ekskýrsııa júrgizýshi O.Lıýterovıch: «Almaty – myń jyldyq tarıhy bar qaıtalanbaıtyn qala. Munda sáýlet óneri men mádenıettiń san túrli ǵajaıyp eskertkishteri shoǵyrlanǵan. Shaharymyz kóz qýandyratyn kórikti oryndarǵa óte baı. Almaty erteden-aq sheteldik jáne otandyq saıahatshylar úshin týrıstik ortalyqqa aınalǵan, endi mine, onyń basqa da jańa múmkindikteriniń kókjıegi kórinip keledi», deıdi.
Jas ólketanýshylar óz zertteýleriniń qorytyndysyn kópshilikke jarııalaı bastady. Mysaly, M.Bazarbaev atyndaǵy №138 mekteptiń 11 synyp oqýshysy Dinmuhamed Álıasqarov óz mektebiniń ólketanýshylar klýby arqyly Almaty qalasyndaǵy ǵımarattardyń tarıhy, kóshe ataýlary, sondaı-aq ataqty adamdardyń ómirbaıany týraly jańa málimetter men aqparattarǵa qanyq bolǵanyn aıtty. Mektep bitirgeli otyrǵan jas túlektiń aıtýynsha, mundaı baǵyttaǵy jumys adamnyń boıyndaǵy izgilik, qurmet sezimin, eń bastysy keleshekke senimin oıatpaı qoımaıdy.
Aıgúl AHANBAIQYZY,
«Egemen Qazaqstan»
ALMATY
