Konstıtýsııalyq Keńes tóraǵasy Qaırat Mámıdiń tóraǵalyǵymen ótken otyrysta Qaraǵandy oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynyń «Neke (erli-zaıyptylyq) jáne otbasy týraly» Kodeksi 47-babynyń 5-tarmaǵyn konstıtýsııalyq emes dep taný týraly usynys qaraldy. Sottyń is júrgizýindegi jańa týǵan sábıdi kútip-baǵýǵa alıment jáne onyń anasyn kútip-baǵýǵa aqshalaı qarajat óndirip alý týraly azamattyq is ótinish berýge sebep bolǵan. Osy usynysta analyqty jáne balalyqty áleýmettik qorǵaý máseleleri qozǵalǵan.
Sottyń pikiri boıynsha Kodekstiń atalǵan normasy Konstıtýsııanyń ana men bala memlekettiń qorǵaýynda bolady degen 27-babynyń talaptarymen sáıkespeıdi. Osyǵan baılanysty otyrysta Parlament depýtattary, Úkimettiń, Bas prokýratýranyń, Ádilet, Bilim jáne ǵylym, Eńbek jáne halyqty áleýmettik qorǵaý mınıstrlikteriniń ókilderi jáne basqa da adam quqyqtaryn qorǵaý uıymdarynyń ókilderi óz pikirlerin bildirdi. Sonymen qatar Konstıtýsııalyq Keńes sarapshylar pikirine taldaý jasady. Al Ata Zańymyzdyń aıshyqtyǵyn ardaqtaıtyn Konstıtýsııalyq Keńes otyrysyna alǵash ret JOO zań fakýltetiniń stýdentteri de qatysty. Bolashaq zańgerler úshin mundaı joǵary deńgeıdegi otyrysta memlekettik organdardyń talqylaǵan máseleleri boıynsha bilikti mamandar pikirlerin tyńdaý zań bilimin naqty tájirıbe isimen ushtastyra túsetini aıqyn.
Jan-jaqty taldaýlardan keıin Konstıtýsııalyq Keńes tóraǵasy aıtylǵan ótinishtiń nysanyn zerdeleı otyryp, otandyq zańnamalar men jekelegen shetelderdiń de praktıkasy taldanatynyn jetkizdi. Osylaısha, buǵan naqty sheshim daıyndaý úshin Konstıtýsııalyq Keńestiń qorytyndy sheshimi qosymsha habarlanatyn boldy.
Aleksandr TASBOLAT,
«Egemen Qazaqstan»
