Áıtse de sol joǵary oqý oryndary men kolledjder stýdentteriniń jataqhanamen qamtylý deńgeıi qandaı degen saýal qoıa qalsańyz, olardyń úni báseńdep, qumyǵyp shyqpaı qalady. Árıne mundaı sylbyrlyq pen enjarlyq Memleket basshysynyń bes áleýmettik bastamasynda qoıylǵan mindetpen esh syıysa almaıdy. Buǵan qarap óńirdegi joǵary oqý oryndary men kolledjderdiń bári birdeı is tetigin tabýda tyǵyryqqa tirelgen desek, shyndyqqa kóleńke túsirip alarmyz.
Bul baǵytta tipti Prezıdenttiń jataqhana jónindegi tapsyrmasy BAQ betterinde jarııalanbastan buryn da ony ońtaıly túrde sheshe bilgen bilim berý shańyraqtary bar. Solardyń biri, tipti biri emes-aý, biregeıi Q.Jubanov atyndaǵy Aqtóbe óńirlik memlekettik ýnıversıteti dep ashyq túrde aıta alamyz. Aıtalyq munda qazirgi kezde stýdentterdiń jataqhanaǵa degen suranystary tolyqtaı ótelý qarsańynda tur. Mysaly, ótken 2017 jyly táýelsizdik merekesi qarsańynda ýnıversıtet stýdentteri úshin 500 oryndyq «Stýdentter úıi» paıdalanýǵa berildi. Oǵan qajetti qarajat, ıaǵnı tabany kúrekteı bir mıllıard teńgeden astam soma óńirlik joǵary oqý ornynyń óziniń ishki qarjylyq resýrstary esebinen tólengen. Buǵan qosa aldaǵy mamyr aıynda 500 oryndyq ekinshi jataqhanada kúrdeli jóndeý jumystary aıaqtalmaq. Tutastaı alǵanda búginde ýnıversıtettiń 3 jataqhanasynda 2000-ǵa tarta stýdent turady, dedi gazet tilshisine Q.Jubanov atyndaǵy Aqtóbe óńirlik memlekettik ýnıversıtetiniń rektory Baýyrjan Erdembekov.
Alaıda aımaqtaǵy atalǵan istiń jaı-kúıi barlyq oqý oryndarynda birdeı emestigi barshaǵa aıan. Aqtóbe oblystyq bilim basqarmasynyń basshysy Lázzat Orazbaevanyń aıtýynsha, oblys aýmaǵyndaǵy 44 kolledjdiń 13-inde múldem jataqhana joq. Qazirgi qolda bar derekter kolledjderdiń 9000-ǵa jýyq oqýshy-stýdenti syrttan ári ózge óńirlerden kelip oqıtynyn kórsetedi. Olardyń 2000-ǵa jýyǵy ǵana jataqhanamen qamtamasyz etilgen.
Iаǵnı bul derektiń ózi kolledj tárbıelenýshileriniń basym bóligi jalǵa alynǵan páterlerde nemese týystarynyń úıinde turatynyn ańǵartady. О́ńirdegi kolledjderdiń belgili bir bóligi Aqtóbe qalasy emes, oblystyń ózge aýmaqtarynda, sondaı-aq aýdan ortalyqtarynda ornalasqan. Jataqhana taýqymeti men qıyndyǵyn kórip júrgender de negizinen el ishindegi kolledjderdiń oqýshylary ekeni belgili bolyp otyr. Sondyqtan da árbir ata-ana munda oqıtyn ul-qyzynyń jaldap alǵan úı jaıyna óz qaltalarynan qosymsha qarajat tóleýge májbúr. Aqtóbe oblystyq ákimdiginiń baspasóz qyzmetinen alynǵan derekte osyndaı kóleńkeli jaıttar baıandalǵan.
Al Aqtóbe oblystyq ishki saıasat basqarmasynda jınaqtalǵan málimetke súıensek, M.Ospanov atyndaǵy Batys Qazaqstan Memlekettik medısına ýnıversıtetiniń stýdentterin jataqhanamen qamtý isiniń jaı-kúıin de qalypty dep aıtý qıyn-aq. Atap aıtqanda atalǵan oqý ornynyń 436 stýdenti jataqhanadaǵy bir kereýettik orynǵa zárý.
Bul aıtylǵandardan shyǵatyn oı-túıin qandaı? Aqtóbe oblysynyń ákimi Berdibek Saparbaev osy máselege baılanysty ótkizilgen keńeste málimdegendeı, óńirdegi basqarmalar men bilim berý salasynyń basshylary bul úshin birinshi kezekte qaı jerde, qansha orynǵa, qandaı jataqhana salynýy kerektigin aldyn ala anyqtap alý qajet. Osy iske qatysty oblys ákimdigi tarapynan aıtylǵan arnaıy tapsyrma da bar eken. Onyń berilgenine bir aı ótipti. Alaıda atalǵan memlkettik mekeme basshylarynyń asyǵatyn túri kórinbeıdi. Istiń ornynan jyljýy men qozǵalýy óte baıaý.
Mundaı jaǵdaıda óńirde jasalǵan jobalar salalyq mınıstrlikterge ýaqytynda jetkizilmeı qalýy ábden múmkin. О́z kezeginde mundaı ógiz aıańnyń aıaǵy aıdyń, kúnniń amanynda jataqhana qurylystary úshin bólinetin qarajattan qaǵylyp qalý kórinisine ákelip tiremesine kim kepil? Munyń ózi Prezıdent bastamasynda qoıylǵan múmkindikti paıdalaný men bos jibermeýdiń basty joly ekeni kámil.
Taǵy bir aıtarymyz, Aqtóbe aımaǵynda memleket-jekemenshik áriptestigin júzege asyrýdyń oń, jarqyn mysaldary mol. Bul jóninde gazetimizdiń betinde aıtylyp ta, jazylyp ta júr. Aıtaıyn degenimiz, jańa ári qosymsha jataqhana qurylystaryn jobalaý kezeńinde tájirıbede ózin-ózi tolyǵymen aqtaǵan tıimdi tutqa tetikterin qozǵap kórgenniń de artyqshylyǵy joq sekildi.
Mine, óńirde oqýshylar men stýdentterdi jataqhana máselesimen qamtý isinde búgingi kúni aldan shyǵyp otyrǵan keıbir túıindi tustar osyndaı.
Temir QUSAIYN,
«Egemen Qazaqstan»
AQTО́BE
