Kezdesý «Bilimdimen dos bolsań...» taqyrybynda Q4 Business School kásipkerlerlik mektebiniń uıymdastyrýymen kásipkerlerdi daıyndaıtyn «Tuǵyr» kýrsy aıasynda ótti. Jınalǵan jastar jáne stýdentter qaýymy aldynda sóz sóılegen Ardaq Nazarov ata-babalarymyzdyń danalyǵy men danyshpandyǵy, batyrlyǵy men qazaqtyń ádet-ǵurpy men salt-dástúri, ımandylyq pen ınabattylyq, bilim men ǵylym, óner men mádenıet, sport pen salaýatty ómir salty, adamzat qundylyqtary jáne taǵy basqa ózekti máseleler tóńireginde tartymdy áńgimeniń tıegin aǵytty. Qazirgi jastardyń kelbeti men bolmysy, óresi men parasaty jáne óskeleń urpaq kimderge qarap boı túzeý qajettigi jaıynda oıǵa qonymdy pikirler aıtyldy. Bıznes tóńireginde de biraz áńgime boldy.
Sondaı-aq bul jıynǵa Qazaq Spınners jobasynyń ınvestory, «Anar-Farm» dárihanasy men «Araı» kólik jýý jelileriniń basshysy Talǵat Saqan, «Bolashaq» baǵdarlamasynyń túlegi, Qazaq Spinners ıdeıasynyń avtory, jobanyń kreatıvti menedjeri Dosan Qaýmen, Dıdjıtal marketıngpen aınalysatyn Tuyndy Media Group, Qbrands.kz ulttyq naqyshtaǵy kúndelikti kıip júrýge arnalǵan erler jeıdesi brendiniń shyǵarýshy ári basshysy Ismaıl Qulan, Q4 Business School mentory, máslıhat depýtaty, THS GROUP kompanııasynyń negizin qalaýshy, «Atameken» Ulttyq kásipkerler palatasynyń múshesi Qaırat Qudaıbergen qatysyp, kópshilikti tolǵandyrǵan saýaldarǵa jaýap berdi.
Esterińizge sala keteıik, Q4 Business School 2017 jyldyń qazan aıynda qurylǵan bolatyn. Maqsaty – táýelsiz elde erkin oılap, kásibin erkin basqaratyn, bıznesin ońaı júıeleıtin álemdik deńgeıdegi básekege qabiletti kásipkerler men kásibı mamandardyń qarymdy býynyn qalyptastyrý. Búginde bıznes mektebiniń 4 aǵym stýdentteri arnaıy kýrstardy bitirdi. Qazirgi tańda sol túlekter ártúrli salada ózderiniń qarym-qabiletterin kórsetip, jeke bıznesterimen aınalysyp júr.
Ǵalym SÚLEIMEN,
«Egemen Qazaqstan»
ALMATY
