Zaısandyq ájeler «Án salý», «Hormen án salý», «Dástúrli án», «Mánerlep óleń oqý», «Aqyndyq óner», «Aspapta oınaý», «Bata berý», «Qolóner», «Sýretshilik óner» syndy bólimderden turǵan básekeniń «Hormen án salý» baǵytynda baq synap, áıgili kompozıtor Shámshi Qaldaıaqovtyń jáne halyq ánderin áýelete shyrqap, top jarypty. Aq jaýlyqty analarymyz «Án salý» janrynda da óreli óner kórsetipti. Jeke án oryndaýda 50-60 jas aralyǵyndaǵy qatysýshylar ishinen qarataldyq Saqysh Nurpeıisova, 71-80 jas aralyǵyndaǵy saıyskerler sanatynda Bákıra Múlikova bas júldeni ıelenipti.
Al dýetpen án salýda Ulbosyn Qaısaqova men Bolat Aqbaeva ansambl qorjynyna taǵy bir bas júldeni salyp, oblysymyzdyń mereıin asyrypty. «Bıyl «Janerke» ansambliniń qurylǵanyna 10 jyl tolady. Soǵan oraı osy saıysta baq synamaq bolyp, kóp eńbektenip, uzaq daıyndaldyq. Namysty qoldan bermeý úshin barymyzdy saldyq. Eńbegimiz aqtalyp, jeńis tuǵyrynan kórindik. Bul – biz úshin úlken qýanysh, abyroı. Osy jobaǵa qatysýymyzǵa múmkindik jasap, demeýshi bolǵan «Aqbaı» sharýa qojalyǵynyń jetekshisi S.Abylǵojınaǵa, kásipker Jeńis Ámirenovke, «Saıhan» JShS jetekshisi V.Dýdnıkke, Zaısan aýdandyq ishki saıasat bóliminiń basshysy Z.Dúısenbaevaǵa erekshe alǵysymyzdy jetkizgimiz keledi», deıdi «Janerke» ájeler ansambliniń jetekshisi Qalıma Isaeva.
Reti kelgende aıta keteıik, ulttyq ónerimizdi ulyqtaý, dástúrlerimizdi dáripteý maqsatynda uıymdastyrylǵan baıqaý belgili jýrnalıst Gúlmıra Nálibaı men «Mereke» prodıýserlik ortalyǵynyń uıymdastyrýymen bıyl alǵash ret ótkizilip otyr.
Azamat QASYM,
«Egemen Qazaqstan»
Shyǵys Qazaqstan oblysy,
Zaısan aýdany
