«Roma» shırek fınalda «Barselonaǵa» qarsylas atanǵan kezde, rımdik jankúıerlerdiń kóńili túsip ketti. Árıne, quramynda Messı men Sýares sekildi saıypqyrandary bar komandaǵa qarsy oınaý molaǵa júgirgenmen teń. «Barselonanyń» da álemdegi kóptegen fanattary jerebe joldas boldy dep, bórkin aspanǵa atty. «Noý Kamptaǵy» alǵashqy oıyn 4:1 bolǵan soń, bul kúmánniń beti odan ári seıile tústi. Tek oıynnyń sońyna qaraı Edın Djekonyń soǵyp ketken goly kóńilge kirbiń túsirgen.
Jaýapty oıyn aldynda osy goldyń mańyzdy ekeni anyq sezildi. Eger «Roma» óz alańynda 3:0 esebimen jeńiske jetetin bolsa, kelesi kezeńge ótýi múmkin. Úzilgeli turǵan úmit jibin shabýylshy Edın Djeko oıynnyń 6 mınýtynda qaıta jalǵady. Degenmen, áli de 2 gol kerek. Ol eki goldy soǵamyn dep júrgende qaqpaǵa Messı bastaǵan myqtylar bir gol soqsa – onda bári kúl talqan bolady. Qorǵanysty myǵym ustap, shaýylda shıraq qımyldaý qajet edi. Sol baıaǵy Djeko Pıkemen alysyp júrip, aıyp alańynda qulap qaldy. Jerar Pıke alyp shabýylshyny qolynan tartyp qulatqanyn tóreshi anyq baıqady. Penaltıdi De Rossı dál oryndady. Odan keıin kezdesýdiń qaharmany bosnııalyq shabýylshy Edın Djeko buryshtama dobyn kóteretin múmkindik jasady. Sol buryshtamaǵa kelgen qorǵaýshy Kostas Manolas Ter Shtegenniń terlep qorǵaǵan qaqpasyna úshinshi goldy soqty. Ǵasyrlyq tarıhy bar «Olımpıko» stadıony mundaı ǵajapty kórmegenine birshama bolǵan. Bul naǵyz Ejelgi Rım ertegisindeı edi. «Roma» Chempıondar lıgasynyń jartylaı fınalyna ótti.
Sońǵy ret «Roma» 1984 jyly táýir óner kórsetti dedik. Sol jyly olar pleı-offtyń 1/8 fınalynda Sofııanyń SSKA klýbymen kezdesedi. Ataǵynan at úrkip turǵan bolgarııalyqtardy jeńýdiń ózi ońaıǵa soqpaǵan. Bir qyzyǵy sol kezde «Romaǵa» qarsy ótken 2 oıynda SSKA sapynda qyzylordalyq «Qaısardyń» qazirgi bas bapkeri Stoıcho Mladenov alańǵa shyqqan. SSKAny aınalyp ótken soń ıtalııalyqtar shırek fınalda Berlınniń «Dınamo» komandasymen kúsh synasady. Osy oıyndarda komandanyń jartylaı qorǵanysynda keıinnen ataqty bapker bolǵan Karlo Anchelottı óner kórsetken. Shved bapkeri Nıls Lıdholmniń bastaýymen «Roma» fınalǵa shyǵyp, onda «Lıverpýlge» penaltı serııasynda jeńilip qalady. Aıtpaqshy, «Manchester Sıtı» komandasyn eki oıynda da jeńgen «Lıverpýl» bıyl «Romamen» taǵy da kezdesip qalýy yqtımal. Ony 13 sáýir, juma kúni bolatyn jerebe sheshpek. Jerebeni ataqty ýkraın shabýylshysy Andreı Shevchenko júrgizedi.
«Roma» - «Barselona» 3:0
Goldar: Edın Djeko 6, Danıele De Rossı 58 (penaltı), Kostas Manolas 82.
Ermuhamed MÁÝLEN,
«Egemen Qazaqstan».
