Kezdesý barysynda áleýmettik jáne jastar saıasatynyń ózekti máseleleri talqylandy. Baqytjan Saǵyntaev bolashaq mamandyqtar boıynsha mamandardy daıarlaý jáne qaıta daıarlaý, tehnıkalyq mamandyqtarǵa bólinetin granttardy kóbeıtý, eńbek naryǵyndaǵy ózgeristerdi jáne sıfrlandyrý men avtomattandyrý jańalyqtaryn eskere otyryp, qajetti daǵdylardy úıretý týraly sóz qozǵady. Sondaı-aq, jataqhanalarmen qamtamasyz etý máselesi de kóterildi.
Premer-Mınıstr Baqytjan Saǵyntaev Úkimet Prezıdenttiń bes áleýmettik bastamasyn iske asyrý aıasynda jol kartasyn qabyldaǵanyn atap ótti. Jol kartasy stýdent jastardy jataqhanamen qamtamasyz etý, búgingi tańda suranysqa ıe tehnıkalyq baǵyttaǵy mamandardy daıyndaý máselelerin sheshýge múmkindik beredi. Jol kartasyn oryndaý 2018 jyldyń ekinshi jartysynda alǵashqy nátıjelerin bere bastaıdy.
Baqytjan Saǵyntaev Tórtinshi ónerkásiptik revolıýsııa máselelerin sheshý úshin mamandardy daıarlaýdyń mańyzdylyǵyn aıtyp ótti. Osyǵan baılanysty Qazaqstanda 20 kolledj iriktelip alynady, olardyń ekeýi búginde jumysqa kirisip te ketti. Sonymen qatar ınjenerlik kadrlardy, onyń ishinde aqparattyq jáne sıfrlyq tehnologııalar salasyndaǵy mamandardy daıarlaýǵa erekshe basymdyq beriledi.
Buǵan qosa, oqý mezgilinde stýdentterdi úı-jaımen qamtamasyz etý máselelerin sheshý úshin Memleket basshysy 2022 jylǵa deıin kem degende 75 myń orynǵa arnap jataqhanalar salýdy tapsyrdy. Kezdesý aldynda Premer-Mınıstr jataqhanalardyń biriniń qurylys barysymen tanysty.
Talqylaý barysynda bilim jáne ǵylym mınıstri E. Saǵadıev bilim alýdyń qoljetimdiligin arttyrý jáne jataqhanalarmen qamtamasyz etý boıynsha atqarylyp jatqan jumystar týraly baıandady. Eńbek jáne halyqty áleýmettik qorǵaý mınıstri M. Ábilqasymova eńbek naryǵynyń ınfraqurylymyn jańǵyrtý jáne tehnıkalyq mamandyqtarǵa mamandardy daıarlaý týraly aıtyp berdi. Atyraý oblysynyń ákimi N. Noǵaev Memleket basshysynyń bes bastamasyn oryndaý maqsatynda óńirde júrgizilip jatqan jumystar týraly baıandady.
Kezdesýde Agrarlyq ýnıversıtet stýdenti B. Jumabaı, Atyraý munaı jáne gaz ýnıversıtetiniń úshinshi kýrs stýdenti S. Bazarbek, Atyraý polıtehnıkalyq kolledjiniń stýdenti B. Serikqalıev jańa tehnologııalyq óndiris oryndarynda jumys isteýge ázirlik týraly aıtyp, «Serpin» jobasy aıasynda túrǵyn úımen qamtamasyz etý, jumysqa ornalasý, jańa ekonomıkaǵa arnalǵan mamandardy daıyndaý boıynsha Worldskills International qozǵalysy máselelerin qozǵady.
Kolledjde áleýmettik bastamalardy iske asyrý týraly Atyraý polıtehnıkalyq kolledjiniń dırektory B. Sherkeshbaeva baıandady.
Baqytjan Saǵyntaev máselelerdi talqylaý qorytyndysy boıynsha jaýapty mınıstrlikter men óńir ákimdigine naqty tapsyrmalar berdi.
