Tipti shotqa qaǵyp, esepke alar bolsa, mundaı sharanyń ózi bıýdjet qarajatynyń únemdelýine az sharapatyn tıgizbeıtin bolsa kerek. Sheneýnikterge salsańyz, turǵyndar mundaı ıgi sharaǵa qarsy bolmaýy kerek: nesi bar, tazalasa – ózderi turatyn qala, aýla, ortaq sharýanyń qamy. Patrıotızmniń ózi osyndaı usaq-túıek sharýalardan bastaý almaı ma?
Kenshiler astanasynda 9 sáýirden bastap 1 maýsymǵa deıin kezeń-kezeńimen senbilik aksııalary ótpekshi. «Barsha qaraǵandylyqtardy senbilikke qatysýǵa shaqyramyn. О́z aýlalaryńyzdaǵy sákilerdi syrlap, aǵash otyrǵyzyńyzdar. Bul – bizdiń dástúrimiz, ortaq jumysymyz. Senbilik – jazdy taza aýlamen qarsy alý úshin kerek», dedi Qaraǵandydaǵy Qazybek bı aýdanynyń ákimi Tatıana Shatohına.
Qaraǵandynyń atqaminerleri eki alaqandy ysqylap, senbilikke muqııat daıyndalǵan eken. Mundaı múmkindikti qalaısha múlt jiberýge bolady? Sonymen Qazybek bı aýdany boıynsha 15 000 gektar aýmaq kúl-qoqystan tazarýy kerek eken. Senbilikke qatysýy tıis adamdar sany da esepke alynyp, tizimge tirkelip qoıǵanǵa uqsaıdy. Iаǵnı bul kúnderi kóshege 87 myńnan astam adam qoldaryna qaraǵan sypyrǵysh pen kúrek alyp, qystan qalǵan qoqysqa qarsy maıdan ashatyn kórinedi.
Erikti túrde senbilikke shyǵatyn belsendi azamattardy ekpindi eńbekke yntalandyryp qoıý jaǵy da umytylmaǵan. «Eń úzdik aýla», «Búkil otbasymen aǵash ek» degen jyl saıynǵy aksııalar bıyl da jalǵasyn tappaq.
Álbette, ómir súretin qalańnyń, turyp jatqan aýlańnyń muntazdaı taza bolǵanyn kim jek kórsin. Qaraǵandylyqtardyń qala basshylarynyń úndeýine túsinistikpen qaraıtynyna kúmán joq. Jurttyń bári tizimnen qorqyp qolyna kúrek, sypyrǵysh alady dep muqatýdyń jóni joq shyǵar. Olardyń ishinde de sanaly túrde kóshe sypyrýǵa shyǵyp, týǵan qalasyndaǵy tazalyqtyń tilmen jalaǵandaı bolýyn qalaıtyndar bolýy ábden múmkin ǵoı.
Taıaýda óńir basshysy Erlan Qoshanov Qaraǵandydaǵy Sátbaev kóshesin jaıaý aralaǵan eken. Sóıtse, osydan eki jyl buryn jóndeýden ótken kósheniń saý-tamtyǵy qalmapty. Apparat jıynynda osy jaıtty aıta kelip, óńir basshysy qala ákimi Nurlan Áýbákirovti synnyń astyna aldy. «Qalany qoqystan jaqsyraq tazartý qajet. Keshe tańerteń men Qaraǵandyny aralap shyqtym. Túsinikti, árıne qar endi ǵana eridi, biraq biz qoqysqa kómilip jatyrmyz. Bir aptadan soń men únemi qalany aralaýǵa shyǵatyn bolamyn. Nurlan Erikbaıuly, siz qalanyń basshysy retinde erterek oıanyńyz. Men emes, siz qalany únemi aralap otyrýyńyz kerek», dedi Erlan Qoshanov.
Qala ákimi bar kináni qar sýyna artty. Bárine kináli – qysta jaýyp, kóktemde erıtin qar eken. Merdigerler solaı dep túsindiripti qala ákimine. Árıne shahar basshysynyń mundaı ýáji oblys ákimin qanaǵattandyrmady. О́ńir basshysy bas merdigerden tyndyrǵan jumystarynyń sapasyna jaýap berýin talap etý kerektigin aıtty.
Qazaqta «Erte turǵan erkektiń yrysy artyq» degen bar. Endi qala ákimi oblys basshysynyń eskertpesinen keıin burynǵydan da erterek turatyn bolar. Tek, másele munymen bite qoısa jaqsy ǵoı. Gáp istiń qııýyn tabýda, sharýany uıymdastyra bilýde. Áıtpese Qaraǵandy sııaqty qazynaly shahardyń kommýnaldyq salada tártip ornatýǵa qajetti qarjylyq hám tehnıkalyq múmkindigi joq degenge kim sensin?
Qaırat ÁBILDA,
«Egemen Qazaqstan»
QARAǴANDY
Sýretti túsirgen Erlan OMAR,
«Egemen Qazaqstan»
