Oblys ortalyǵyndaǵy joǵary oqý oryndarynyń stýdentteri, oqytýshylary, «Jańǵyrý jol» jastar shtabynyń músheleri men etnomádenı birlestik belsendileri qatysqan shara barysynda kezdesýge jıylǵandar jobanyń mańyzdylyǵyna jan-jaqty toqtaldy. «Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń aıasynda bir jyl kóleminde az jumys atqarylǵan joq. Osy rette «Jańa gýmanıtarlyq bilim. Qazaq tilindegi 100 jańa oqýlyq» jobasyn erekshe aıtýǵa bolady.
Bul – jastarǵa arnalǵan aýqymdy joba. Álemniń eń úzdik avtorlarynyń eńbekterin endi sizder qazaq tilinde oqýǵa múmkindik aldyńyzdar», - dedi О́skemendegi Dostyq úıi – qoǵamdyq kelisim ortalyǵynyń dırektory Eldar Tóleýbekuly jıynnyń ashylýynda sóılegen sózinde. Tarıh ǵylymdarynyń kandıdaty, qoǵam belsendisi Ádil Saılaýbek bul joba memlekettik tildiń mereıin asyratyn mańyzdy qadamdardyń biri ekendigin aıtty. «Jobanyń ereksheligi, qundylyǵy – biz buǵan deıin kóptegen eńbekterdi orys tilinde oqyp kelsek, endi túpnusqadan aýdarylǵan týyndalardy oqýǵa múmkindik týyp otyr.
Bul óz kezeginde ana tilimizdiń qoǵamdaǵy rólin nyǵaıta túsýge yqpal etedi», - deıdi ol. Sársen Amanjolov atyndaǵy Shyǵys Qazaqstan memlekettik ýnıversıtetiniń «Qazaqstan tarıhy jáne áleýmettik – gýmanıtarlyq pánder» kafedrasynyń aǵa oqytýshysy Maıra Shúrshitbaıqyzy jobanyń oqytýshylar úshin de, stýdentter úshin mańyzy zor ekendigin tilge tıek etti. «Biz aldaǵy ýaqytta álemdegi aıtýly oqý oryndarynyń bilim berý baǵdarlamasyndaǵy oqýlyqtarmen óz stýdentterimizge dáris oqıtyn bolamyz. Men fılosofııa jáne dintaný pánderinen dáris oqımyn. Buǵan deıin osy pánderge qatysty oqýlyqtardyń jetispeýshiligi baıqalatyn. «Rýhanı jańǵyrý» baǵdarlamasy aıasynda júzege asyrylyp otyrǵan joba bul túıtkildiń túıinin tarqatary anyq», - deıdi oqytýshy.
Azamat QASYM,
«Egemen Qazaqstan»
О́SKEMEN
