Forým óz tarıhynda 6000 asa sheteldik qatysýshylardy, olardyń qatarynda tanymal jýrnalıster, belgili saıasatkerler, myqty ekonomıster, nobel syılyǵynyń laýreattary, qoǵam qaıratkerleri, ǵalymdar men kásipkerlerdi Qazaqstanǵa jınaǵan.
EMF spıkerleri qatarynda: Islam respýblıkasynyń eks-prezıdenti Iran Mohammad Hatamı, Aýǵanstannyń 12-shi prezıdenti Hamıd Karzaı, amerıkandyq dıplomattar Rıchard Holbrýk pen Rıchard Perl, AQSh-tyń burynǵy kongressmeni Harold Ford, Ulybrıtanııanyń Syrtqy ister eks-mınıstri Djek Stro, Gresııanyń Týrızm eks-mınıstri jáne Parlament múshesi Olga Kefaloıannı, brıtandyq fýtýrolog Reı Hammond, Vladımır Pozner, Maksım Shevchenko, Mıhaıl Leontev, Pıter Lavel, Pola Slıer, Stıven Koýl, Nık Goýıng syndy tanymal jýrnalıster, ITAR-TASS aqparattyq agenttiginiń jetekshileri Vıtalıı Ignatenko men Mıhaıl Gýsman, jazýshy Shyńǵys Aıtmatov, RF Úkimetiniń burynǵy basshysy Evgenıı Prımakov, ODKB bas hatshysy Nıkolaı Bordıýja, AQSh-tyń ulttyq qaýipsizdik boıynsha burynǵy keńesshisi Zbıgnev Bjezınskıı jáne t.b. boldy.
Eýrazııa Medıa Forýmy 3 kún ótedi. Jıynda 7 plenarlyq sessııa bolady. Álemdik sarapshylar sheberlik dárisine bir kúndi arnaıdy.
Forým qonaqtaryn jańa pikirtalas alańy, qyzyqty taqyryptar, mazmundy áńgime, spıkerlerdiń tanymal toby kútedi. Bul jolǵy Forým «Evolıýsııanyń 15 jyly: álem ózgerisi men bizdi ózgertýi».
Bul rette, forým uıymdastyrýshylary Qazaqstannyń álem aldyndaǵy bedeliniń kún sanap artyp kele jatqandyǵyn, forýmnyń munda tıimdi ári zamanaýı qural retinde rólin atap ótpekshi. Forým óziniń belsendi jumysynyń arqasynda búginde dúnıe júzi boıynsha bedeldi medıa alań atanǵan. Onyń dáleli retinde 1500 aıtýly BAQ: Euronews, CNN, BBC, Associated Press Television News, Reuters, Bloomberg, New York Times, Al Jazeera English, ITAR-TASS, RIA «Novostı», RBK, Russia Today, Pervyı kanal, IA «Djıhan» jáne t.b. qatysqandyǵy bola alady.
Bıylǵy forým taqyryptary: «Halyqaralyq qarym-qatynastaǵy evolıýsııa», «Eýropalyq odaq evolıýsııasy», «Qorshaǵan orta evolıýsııasy», «Aqparattyq tehnologııalar: naqty derek pen feık jańalyqtar», «Blogsferanyń kúsheıýi: progress pe, álde qaýip pe?» jáne taǵy basqa.
Al, naqty bıylǵy forýmnyń qatysýshylary qatarynda – memlekettik qaıratker, eks-premer-mınıstr, Italııa parlamentiniń senatory Matteo Rensı, BAQ bostandyǵy boıynsha EQYU (OBSE) ókili Arlem Dezır, amerıkalyq polıttehnolog, Barak Obama prezıdenttigi kampanııasynyń ekeýinde de keńesshi bolǵan Rodjer Fısk, Ulybrıtanııa Syrtqy ister mınıstrliginiń baspasóz hatshysy Saımon MakDjı, Grýzııanyń eks Bilim mınıstri Hatııa Dekanoıdze, VVS telearnasynyń jańalyqtar bóliminiń redaktory Gevın Hıýıtt, halyqaralyq saıasat boıynsha fransýz sarapshysy, Le Figaro gazetiniń sholýshysy Reno Jırar, Japonııanyń turaqty energetıkany damytý ınstıtýtynyń dırektory Tesýnarı Iıda, reseı jýrnalısti, prodıýser, ári telejúrgizýshi Sofıko Shevardnadze, senator, AQSh-tyń Qytaı Halyq Respýblıkasyndaǵy elshisi Maks Baýkas, BUU halyqaralyq «BUU – áıelder» bóliminiń Ortalyq Azııa boıynsha basshysy Ileın Konkıevıch.
Sonymen qatar, mereıtoılyq forýmnyń baǵdarlamasynda birneshe avtorlyq master-klasstar uıymdastyrylyp otyr. Onda Shýbert Medıa konsýltanty Taıra Shýbert, tanymal jýrnalıst Shahıda Iаkýb, Hashtag Our Stories jobasynyń negizin qalaýshylardyń biri Iýsýf Omar, saıasatker Bartosh Rydlınskıı, CEO Select Communication Group basshysy Vıktor Elıseevter bar.
«Eýrazııalyq medıa forýmnyń bıylǵy kontenti dástúrli túrde zamanaýı ózekti birqatar máselelerdi talqylaıtyn bolady. Olardyń qatarynda, aqparattyq tehnologııalardyń qarqyndy ósýi, turaqty damýdyń birden-bir sharty retinde «jasyl ekonomıka» tujyrymdamasy, taǵy basqa kóptegen máseleler kóteriledi. Bul rette, mereıtoılyq forýmnyń halyqaralyq arenada elimizdiń bedelin arttyrýǵa qosqan úlesiniń orasan ekendigin kórsete alatyndyǵymyzǵa senimim mol», dep atap ótti Eýrazııalyq Medıa Forým bas dırektory Rýslan Jemkov.
Aınash ESALI,
«Egemen Qazaqstan».
ALMATY
