«Alga Qazaqstan!» dep atalatyn baǵdarlama usynylyp, oǵan komıssııa músheleri biraýyzdan daýys berdi. Endi elimizdegi fýtboldyń damýy basqasha sıpat alady. Iаǵnı balalar men jasóspirimder fýtboly qolǵa alynbaq. Fýtbol federasııasy halyq jappaı fýtbolmen aınalyspasa, talanttardy tabýy uzaqqa sozylatynyn baıqapty. San bolmaı sapa da bolmaıdy degen toqtamǵa kelipti. Keń baıtaq aýmaǵy bar elimizdiń túkpir-túkpirine fýtbol oıynyn aparý úshin 2022 jylǵa deıin elimizde 6175 fýtbol ortalyqtary men akademııalary salynady. Olardyń birshamasy osy kúni salynyp jatqanyn, aldy paıdalanýǵa berilgenin QFF Bas hatshysy Azamat Aıthojın málimdedi.
Al federasııa prezıdenti Ádilbek Jaqsybekov balalar fýtbolyn damytý úshin arnaıy Qurban Berdyev pen onyń kómekshisi Ivan Danılıansty attaı qalap aldyrtypty. Qazan qalasynyń «Rýbın» komandasyn damytyp, kúlli Tatarstan fýtbolyna baǵdarlama jasap bergen Qurban Berdyevtiń elimizge kelýi buryn bolmaǵan oqıǵa edi. Qazaqstan fýtbolynan túlep shyǵyp, ózge elde qyzmet etip júrgenderdi qaıta shaqyryp, olardyń basyn qosý buryn-sońdy tájirıbede bolmaǵan jaǵdaı ekeni ras. QFF-nyń kezekti XVII konferensııasy shynyn aıtýymyz kerek, kóńilge jylý syılady. Buryndary ótken basqosýlarda taptaýryn taqyryptardy qaıtalap, turǵan jerin qaza bergen taýyqtaı mardymdy eshteńe ónbeı aıaqtalatyn. Al bul joly Quralbek Ordabaev, Evstafıı Pehlevanıdı, Seıildá Baıshaqov sekildi el fýtbolyna eńbegi sińgen belgili adamdar biraýyzdan jańa baǵdarlamany qoldap, batasyn berdi. «Bataly iste bereke bar» demeýshi me edi, kórelik.
Qazir elimizdiń ártúrli aýdandaryndaǵy 208 mektepte fýtbol sabaǵy ótip jatyr. 2022 jylǵa deıin bul joba kúlli respýblıkany qamtýy tıis. Bul jerde Bilim jáne ǵylym mınıstrliginiń seriktestigi qajet. Fýtbol federasııasyndaǵylardyń aıtýynsha, osy kúni jarııa bolyp otyrǵan myna derek oılanýǵa májbúrleıdi. Qazaqstanda fýtbol úıirmesine barǵysy keletin 200 myńǵa jýyq bala arnaıy tirkeýde tur. Halyq arasynda fýtbolǵa degen qyzyǵýshylyqtyń kúrt óskenin bizdiń paıymymyz «Astana» men «Qaırattyń» eýrokýboktaǵy jetistikterimen joramaldaıdy. 2008 jyly týra osyndaı oqıǵa Reseıde de tirkelgen. Roman Pavlıýchenko men Andreı Arshavınniń erliginen keıin, Reseı quramasy Nıderlandyny jeńip, Eýropa chempıonatynyń jartylaı fınalyna shyqqan kúnniń ertesine fýtbol úıirmesine qatysqym keledi degen 300 myń ótinish túsken. Bul bir kúnniń ǵana nátıjesi. Gýs Hıddınktiń baptaýymen óner kórsetken Reseı ulttyq quramasy eldegi fýtbol «býmyna» bastaý berip edi.
Qazannan kelgen qonaq Ivan Danılıans qyzyqty mysal keltirdi. Álgi, muzda júzip júretin aısbergtiń tek 10 paıyzy ǵana kórinetin bolsa, qalǵan negizgi bóligi kórinbeı sý astynda turady deıdi. Sol sekildi el fýtbolynyń tiregi ári negizi balalar fýtboly bolýy tıis eken. Jáne sonyń ishindegi myqty degen 10 paıyzy ǵana ulttyq quramaǵa alynyp, kózge kórinip turady-mys. Sondyqtan da, kezekte turǵan 200 myń balanyń fýtbolshy bolamyn degen úmitin úzsek, onda quramaǵa alynatyn 20 myqty fýtbolshydan aırylǵanymyz. Demek, fýtbol akademııalary men úıirmeleriniń salynýy kezek kúttirmeıtin sharýa bolyp tur. «Bul máseleler sheshilgenshe, árbir shaǵyn aýdannyń ishindegi alańqaılarǵa jasandy jasyl alańdar tóseý kerek. Bul fýtbolǵa buqaralyq sıpat alyp keletin mańyzdy tus», deıdi Ádilbek Jaqsybekov.
Keleli keńesten soń jıynda bolǵan ıgi jaqsylar irgetasy endi qalanǵan «Fýtbol úıi» kesheniniń jasyl alańynda joldastyq kezdesý ótkizdi. Olardyń qatarynda Aqparat jáne kommýnıkasııalar mınıstri Dáýren Abaev, Din isteri jáne azamattyq qoǵam mınıstri Darhan Káletaev, Qostanaı oblysynyń ákimi Arhımed Muhambetov sekildi laýazymdy tulǵalar boldy.
Osyndaı jurtqa syıly, kópke sózi ótetin memlekettik bıliktiń basy-qasynda júrgen saıasatkerlerdiń de atalmysh sharada usynystaryn aıtyp, jumyla judyryq bolýynyń ózi el fýtbolynyń bolashaǵy jarqyn bolatynyna sendiredi. El fýtbolynyń damýyna baılanysty árkim óz oıyn aıta alatyny beseneden belgili. Ol qazir erinbegenniń ermegine aınalǵan. Tek qabyldanǵan durys baǵdarlama iske assa eken dep tileısiń. Áıtpese sóz sóz kúıinde qala bergen kezder az emes edi-aý...
Ermuhamed MÁÝLEN,
«Egemen Qazaqstan»
