«Mádenıetaralyq únqatysýdy ilgeriletý uıymymyzdyń basty maqsattarynyń biri bolyp tabylady, sondyqtan IýNESKO Mádenıetter jaqyndasýynyń halyqaralyq onjyldyǵyn jarııalaýda Qazaqstannyń úlesin erekshe baǵalaıdy», degen O.Azýle elimizdiń basshylyǵyna uıym qyzmetindegi kórsetkeni negizgi baǵyttar boıynsha jobalarǵa qoldaý kórsetkeni úshin shynaıy rızashylyǵyn bildirdi.
IýNESKO Bas dırektory dúnıejúzilik mura jáne materıaldyq emes mádenı mura tizimderine, bıosferalyq rezervattar men jahandyq geoparkter jelilerine, «Álem esteligi» baǵdarlamasy aıasyndaǵy biregeı derekkózder jıyntyǵyna qazaqstandyq nomınasııalardy engizý boıynsha júıeli jumysty erekshe atap ótti.
О́z kezeginde Qazaqstan elshisi J.Ǵalıev atalǵan uıymnyń basshysy O.Azýleni iri halyqaralyq uıymnyń basyndaǵy jaýapty mıssııasynyń bastalýymen quttyqtap, elimizdiń IýNESKO-nyń bıik qaǵıdattary men qundylyqtaryna qurmetpen qaraıtynyn atap ótti.
O.Azýle sonymen birge elimizde Prezıdent Nursultan Nazarbaev bastaǵan «Rýhanı jańǵyrý» baǵdarlamasy men «Jahandaǵy zamanaýı qazaqstandyq mádenıet» jobasyn júzege asyrý barysynan, Álemdik jáne dástúrli dinder kóshbasshylarynyń VI sezi baǵdarlamasynan habardar etildi. Taraptar Almatydaǵy IýNESKO Klasterlik bıýrosynyń belsendi jumysy men 2017 jylǵy qarashada uıymnyń Bas konferensııasynyń sheshimimen maquldanǵan IýNESKO qamqorshylyǵyndaǵy Mádenıetter jaqyndasýynyń halyqaralyq ortalyǵynyń tez arada ashylýynyń mańyzyn sóz etti.
Esterińizge sala ketsek, 1992 jyldyń 22 mamyrynan bastap Qazaqstan Birikken Ulttar Uıymynyń Bilim, ǵylym jáne mádenıet jónindegi uıymynyń (IýNESKO) tolyqqandy múshesi bolyp tabylady. Bedeldi halyqaralyq uıymmen yntymaqtastyǵymyzdy Qazaqstannyń IýNESKO jáne ISESKO isteri jónindegi ulttyq komıssııasy úılestiredi. Osy kúnge deıin derekti muranyń «Álem esteligi» halyqaralyq tizimine – 3, Dúnıejúzilik mura tizimine – 5, materıaldyq emes mádenı mura tizimine – 8, bıosferalyq rezervattar jelisine – 9, estelik datalar kúntizbesine 21 Qazaqstan nomınasııalary engizildi. Elimizde IýNESKO-nyń 6 kafedrasy, 31 qaýymdastyrylǵan mektebi, 50-den astam klýby, Ortaazııalyq óńirlik glıasıologııalyq ortalyǵy isteıdi. Prezıdent N.Nazarbaevtyń bastamasymen BUU Bas Assambleıasy óz qararymen 2013-2022 jyldar merzimin Mádenıetter jaqyndasýynyń halyqaralyq onjyldyǵy etip jarııalady jáne IýNESKO-ny tıisti baǵdarlamany júzege asyrýǵa jaýapty qurylym retinde belgiledi.
