Otyrysta alǵashqy bolyp sóz alǵan Qazaqstan Respýblıkasy Ishki ister mınıstriniń orynbasary Erlan Turǵymbaev: «Qazaqstan – Eýrazııanyń dál ortasynda ornalasqan irgeli memleket. Sondyqtan da jyl saıyn sheteldiń 3 mıllıon azamaty osy aýmaqtan tranzıtpen ótedi. Taǵy 2,5 mıllıon adam qyzmet baby, jeke sharýasy nemese bilim alý úshin bizdiń respýblıkaǵa kelýde. Solardyń 90 paıyzy TMD elderiniń azamattary. Ásirese eńbek mıgranttary kóp. Jasyratyny joq, eldegi saıası jáne ekonomıkalyq turaqtylyqtyń qalyptasýy, ınvestısııalyq ahýaldyń jaqsarýy, týrıstik ımıdjdiń artýy jáne asa mańyzdy halyqaralyq sharalardyń uıymdastyrylýynyń arqasynda Qazaqstanǵa kelýge qulshynys tanytyp otyrǵandardyń sany jyldan jylǵa kóbeıip keledi. Máselen, byltyrǵy jyldyń ózinde ǵana XXVIII qysqy Dúnıejúzilik Ýnıversıada men Halyqaralyq EKSPO kórmesin tamashalaý úshin ǵana 3 mıllıonnan asa týrıst bizdiń elge at basyn burdy. Sonymen qatar Elbasy Nursultan Nazarbaevtyń tikeleı uıytqy bolýymen Astanada halyqaralyq qarjy ortalyǵy quryldy. Onyń negizgi mindeti – qarjylyq qyzmet salasynda ınvestısııalaý úshin tartymdy orta qurý arqyly el ekonomıkasyna tikeleı shetel ınvestısııalaryn tartýǵa járdemdesý, Qazaqstan Respýblıkasynyń baǵaly qaǵazdar naryǵyn damytý, onyń halyqaralyq kapıtal naryqtarymen yqpaldasýyn qamtamasyz etý bolyp tabylady. Osy uıymnyń qurylýy ınvestısııalyq ınfraqurylymdy damytýǵa, ınnovasııalyq tehnologııalar men álemdik deńgeıdegi qarjy qyzmetterin usyný úshin qosymsha ınfraqurylymdy yntalandyrýǵa jańa serpin berdi», dedi.
Quzyrly organdar usynǵan málimetke sensek, qazirgi kezde Qazaqstanǵa 30 táýlikke deıingi ýaqytqa kelgen 61 memlekettiń azamattaryna vızanyń esh qajeti joq. Tranzıttik baǵytpen júrgen Qytaı men Úndistannyń azamattary 72 saǵat boıy Astana men Almaty qalalaryn vızasyz emin-erkin aralaı alady. Ekonomıkasy damyǵan, saıası turaqta 56 memlekettiń azamattary shekaradan asqanda mıgrasııalyq qyzmetke arnaıy kelip tirkelmeıdi eken. Onyń barlyǵyn onlaın rejimde júzege asyrýǵa bolady.
Qazaqstan Ishki ister mınıstrligi Mıgrasııalyq qyzmet komıteti tóraǵasynyń orynbasary Arman Sadanov zańsyz mıgrasııamen kúrestiń qalaı júrip jatqany jaıynda áńgimelep, naqty derekterdi alǵa tartty.
Taǵy bir jaǵymdy jańalyq, ústimizdegi jyldyń 1 shildesinen bastap elektrondy vızalar berile bastaıdy. Iаǵnı vıza alý nemese tirkelý qajettigi týyndaǵan jaǵdaıda ár azamat konsýldyqqa barmaı-aq, úıindegi ınternet arqyly osy máseleni ońdy sheshe alady.
Ǵalym SÚLEIMEN,
«Egemen Qazaqstan»
ALMATY
