Taıaýda Qaraǵandy oblystyq beıneleý óneri murajaıynda jas sýretshiniń jeke kórmesi ótken bolatyn. Kórmede túrli janrlarda oryndalǵan 30 týyndy kórermen nazaryna usynyldy. Kelýshiler munda dızaınerlik panno, akvareldi portretter, tabıǵat taqyrybynda salynǵan kórkem týyndylar serııasyn, sondaı-aq avtorlyq karıkatýralardy tamashalaı aldy.
– «Oıaný» degen lırıkalyq ataýy bar kórme – bizdiń «Jańa esimder» jobamyzdaǵy tórtinshi kórme, – deıdi shara jetekshisi, oblystyq beıneleý óneri murajaıynyń ǵylymı qyzmetkeri Vıktorııa Hrapko. – Avtor sýretterin aldyn ala qaryndashpen syzyp almastan, birden salady. Ol degenimiz, sýretshiniń kórý qabileti tamasha jáne grafık retinde myqty maman ekenin kórsetedi.
Erkebulan – «Art help» jastar shyǵarmashylyq birlestiginiń múshesi. Bul qaıyrymdylyq uıymynyń quramynda Qazaqstannyń 16 qalasynyń 30-dan astam jas sýretshisi bar. Birlestik músheleri óz kartınalaryn satyp, tapqan qarajatty aýyr dertke shaldyqqan balalar qoryna aýdarady.
Erkebulan Moldabekovtiń bul alǵashqy jeke kórmesin qaıyrymdylyq saýda-kórmesi dep te ataýǵa bolady. Sýretshiniń kartınalary 1500 teńgeden 50 000 teńge aralyǵynda baǵalandy. Eń qymbat týyndy – boksshy Gennadıı Golovkınniń qoly qoıylǵan portret boldy. Sýretterdi satýdan túsken qarajatty avtor Arýjan Saınnyń qaıyrymdylyq qoryna aýdarýdy josparlap otyr.
Qaırat ÁBILDA,
«Egemen Qazaqstan»
QARAǴANDY
