Is-shara Elbasy Nursultan Nazarbaevtyń quttyqtaý hatymen ashyldy. Memleket basshysynyń sózin Qazaqstannyń Fransııadaǵy Tótenshe jáne ókiletti elshisi Jan Ǵalıev oqyp berdi.
«Kóptegen elderdiń ǵalymdary men sarapshylarynyń, tarıhshylary men til mamandarynyń qatysýymen mundaı alqaly jıynnyń Eýropa tórinde, Parıj qalasynda ótýiniń erekshe sımvoldyq máni bar. Álemdik órkenıetke ólsheýsiz úles qosqan Túrki jurtynyń qara shańyraǵy ‒ Qazaqstan san myń jyldyq tamyrly tarıhynyń ketkenin keltirip, kemin toltyrǵan «Mádenı mura», «Halyqaralyq tarıh tolqynynda» syndy baǵdarlamardy iske asyrdy.
Byltyrdan beri tarlan tarıhtyń, jasampaz búgingi kún men jarqyn bolashaqtyń kókjıekterin úılesimdi sabaqtastyratyn ult jadynyń tuǵyrnamasy ispetti «Rýhanı jańǵyrý» baǵdarlamasyn qolǵa aldy.
Osynyń nátıjesinde barsha adamzat tarıhymen ushtasatyn tarıhı-mádenı muralarymyzdyń ǵylymı aınalymdaǵy órisi keńeıdi. Dańqty babalarymyzdan mıras bolǵan rýhanı qazynalar halqymyzdy ótkenniń óshpes ónegesimen qaýyshtyryp, jarqyn bolashaqqa jol ashty.
Meniń bastamammen Astanada ashylǵan Halyqaralyq Túrki akademıasy osy baǵytta jemisti jumystar atqaryp keledi. Sonyń bir aıǵaǵyndaı búgingi forým arqyly Eýrazııa tósin jaılaǵan baýyrlas elderdiń ortaq muralary keńinen ulyqtalyp, elaralyq, mádenıetaralyq dıalog odan ári zor serpinge ıe bolaryna senemin. Forým jumysyna sáttilik tileımin!», delingen Elbasynyń forým qatysýshylaryna arnalǵan quttyqtaý hatynda.
J.Ǵalıev bilim men ǵylymnyń «ǵıbadathanasy» atanǵan IýNESKO-da ótip jatqan sharanyń mańyzyna toqtaldy. Sondaı-aq jıyndy uıymdastyrǵany úshin Halyqaralyq Túrki akademııasyna alǵysyn jetkizdi.
Sonymen qatar forým barysynda Ázerbaıjan, Qyrǵyzstan Prezıdentteriniń quttyqtaý hattary oqyldy. Jıyn IýNESKO-nyń «Murany saqtaý, nasıhattaý jáne jalǵastyrý» strategııalyq mindetine úles qosý maqsatymen uıymnyń shtab-páterinde ótip jatyr. Elbasynyń «Rýhanı jańǵyrý» baǵdarlamasyn nasıhattaý maqsatynda uıymdastyrylǵan is-shara Túrki áleminiń qundylyqtaryn zerttep, zerdeleý jáne nasıhattaýdy maqsat etken.
Jıynǵa 16 elden ǵylym, mádenıet jáne qoǵam qaıratkerleri, saıasatkerler men dıplomattar qatysty. Forým barysynda qatysýshylar «Túrki jazba eskertkishteri», «Túrki tili men ádebı-mádenı muralary», «Túrki tilderiniń taralý arealdar» máseleleri tóńireginde baıandamalar jasaıdy.
Abaı ASANKELDIULY
«Egemen Qazaqstan»
PARIJ
