«Halyqaralyq Túrki akademııasy uıymdastyrǵan forým jumysyna qatysýshylardy shyn júrekten quttyqtaımyn! Jıyrmaǵa jýyq elden kelgen ǵalymdar, túrkitanýshylar, zertteýshiler forým barysynda túrki halyqtary men túrki tilinde sóıleıtin ulttardyń qarym-qatynasyn nyǵaıta túsetinine senimdimin», dedi I.Álıevtiń hatyn oqyp bergen Ázerbaıjannyń IýNESKO-daǵy turaqty ókili Anar Karıev.
Budan bólek, Ázerbaıjan Prezıdenti is-sharanyń álemdegi mádenı muralardy qorǵaýmen shuǵyldanatyn IýNESKO-da ótýiniń mańyzy zor ekenin atap kórsetti. Sondaı-aq I.Álıev forýmnyń túrki halyqtary arasyndaǵy qarym-qatynasty nyǵaıtýmen qatar, ǵalymdar men zertteýshilerdiń ózara baılanys ornatýyna múmkindik beretinine senim bildirdi.
«Ázerbaıjan árdaıym Túrki tildes memleketter men halyqtar arasyndaǵy búkil saladaǵy baılanystyń damýyn qoldap keledi. Forým aıasyndaǵy pikirtalastar men talqylaýlar qazirgi tańda Túrki tilderi kezdesip otyrǵan máselelerdi sheshýge, áriptestikti jáne qarym-qatynasty nyǵaıtýǵa kómektesedi dep senemin», delingen úndeýde.
Budan keıin Qyrǵyzstannyń Fransııadaǵy Turaqty jáne ókiletti elshisi Aseıın Isaev S.Jeenbekovtyń quttyqtaýyn oqyp berdi. Qyrǵyzstan basshysy óz hatynda forým barysynda Shyńǵys Aıtmatovtyń 90 jyldyq mereıtoıy atalyp ótýiniń mańyzy zor ekenine toqtaldy.
«Shyńǵys Aıtmatov ‒ qyrǵyzdyń ataqty gýmanıst-jazýshysy, dramatýrg, kórnekti memlekettik jáne qoǵam qaıratkeri. Onyń shyǵarmalarynda ótken men keleshek, ulttyq jáne jahandyq máseleleri aıtylyp, zamandastarynyń dúnıe tanymyn keńeıte túsken», deı kele úndeýde Sh.Aıtmatovtyń eńbekteriniń mańyzy aıtylǵan.
Sonymen qatar S.Jeenbekov 2018 jylǵy qazanda Qyrǵyzstanda Shyńǵys Aıtmatovqa arnalǵan úlken jıynnyń ótetinin jetkizdi. «IýNESKO men Halyqaralyq Túrki akademııasy uıymdastyrǵan forýmǵa qatysýshylarǵa shyǵarmashylyq tileımin», dep qorytyndylanǵan Qyrǵyzstan Prezıdentiniń quttyqtaý haty.
Aıta ketý kerek, is-shara IýNESKO-nyń «Murany saqtaý, nasıhattaý jáne jalǵastyrý» strategııalyq mindetine úles qosý maqsatymen uıymnyń shtab-páterinde ótip jatyr. Elbasynyń «Rýhanı jańǵyrý» baǵdarlamasyn nasıhattaý maqsatynda uıymdastyrylǵan is-shara Túrki áleminiń qundylyqtaryn zerttep, zerdeleý jáne nasıhattaýdy maqsat etken.
Jıynǵa 16 elden ǵylym, mádenıet jáne qoǵam qaıratkerleri, saıasatkerler men dıplomattar qatysty. Forým barysynda qatysýshylar «Túrki jazba eskertkishteri», «Túrki tili men ádebı-mádenı muralary», «Túrki tilderiniń taralý arealdar» máseleleri tóńireginde baıandamalar jasaıdy.
Abaı ASANKELDIULY
«Egemen Qazaqstan»
PARIJ
