Jıynda IýNESKO Hatshylyǵynyń halyqaralyq baılanystar departamentiniń dırektory Gens Seıtı sóz alyp, is-sharaǵa qatysýshylardy quttyqtaı kele qazaq tilinde «Qosh keldińiz!» dedi.
«Qazirgi tańda túrki tilderi álemniń basqa tilderi sekildi birqatar synaq aldynda tur. Tehnologııalyq tildiń jedel damýy qoǵam arasyndaǵy baılanysty keńeıtip, bilimimizdi ulǵaıta tústi. Nátıjesinde sıfrly tehnologııanyń tili ǵylymı, mádenı ortada keńinen paıdalanylyp keledi. Osy turǵydan alǵanda IýNESKO ǵalymdardy, zertteýshilerdi jáne tarıhshylardy qoldaýda úlken ról atqaryp keledi», dedi G.Seıtı.
IýNESKO ókiliniń paıymdaýynsha, jahandanýdyń arqasynda shartaraptyń kez kelgen buryshyndaǵy daýys estiledi hám qurmetteledi. О́ıtkeni til bir ulttyń áleýmettik qundylyqtary men biregeıligin kórsetetin birden-bir qazyna.
«Halyqtardyń ózine tán mádenı erekshelikteri bolmaǵan jaǵdaıda beıbitshilik ornaýy qıyn. Al ár ultqa tán basty biregeılik – onyń tili. О́zderińiz biletindeı, IýNESKO mádenı ár alýandyqty saqtap qalýǵa arnalǵan «Mádenıet salasyndaǵy saıasatty reformalaý» dep atalatyn jobany bastady. Bul shara álemde mádenı qundylyqtardy qaıta qaraýǵa arnalǵan. Máselen, osy joba aıasynda adamzatqa ortaq tulǵalardyń mereıtoılaryn toılaımyz», dedi G.Seıtı.
Sondaı-aq Maǵjan Jumabaevtyń 125 jyldyǵy men Shyńǵys Aıtmatovtyń 90 jyldyǵyna arnalǵan is-sharalar arqyly jergilikti halyqtyń jazý jáne aýyz ádebıetin jan-jaqty uǵynýǵa múmkindik týǵanyn málimdedi.
Abaı ASANKELDIULY,
«Egemen Qazaqstan» – PARIJ
Sýretti túsirgen Fızýlı MEDJIDLI
