Astanada Qasym Qaısenovtiń týǵanyna 100 jyl tolýyna oraı jıyn ótti

Is-shara Qazaqstan Respýb­lıkasy Ulttyq mýzeıiniń ǵylymı-ádistemelik qyzmeti, Qazaqstan tarıhy bóliminiń uıymdastyrýymen ótti. Oǵan Astana qalasy ardagerler keńesiniń ókilderi, Ardagerler uıymy respýblıkalyq qoǵam­dyq birlestigi Ortalyq keńe­si tóraǵasynyń orynbasary О́mirzaq Ozǵanbaı, memleket­tik mekemelerdiń, mádenıet salasynyń qyzmetkerleri, sondaı-aq mektep oqýshylary qatysty.    

Saltanatty jıynnyń maq­sa­ty – Qasym Qaısenovtiń erligin óskeleń urpaqtyń bo­ıy­na sińirý, olardyń pat­rıot­tyq sezimin oıatý.

– Surapyl soǵys adam­zatqa qulaq estimegen, kóz kórmegen qıyndyqtardy alyp keldi. Sonyń saldarynan 50 mıllıon adam qaza tapty. Al onyń 27 mıllıony elin, jerin qorǵaǵan Keńes Odaǵynyń Batyrlary edi. Al Qazaq elinen bir mıllıonnan astam adam soǵysqa attandy. Iаǵnı sol kezdegi Qazaqstan halqynyń 25 paıyzy qatysty. Onyń 600 myńy soǵys dalasynda sheıit boldy. Mundaı kórsetkish Keńes Odaǵynyń quramyndaǵy res­pýb­lıkalardyń eshqaı­sy­synda bolmaǵan, – dep eske aldy О́mirzaq Ozǵanbaı.

Sóz arasynda ol eńbek ar­mııasynda 700 myń qazaq­standyq bolǵanyn aıtyp berdi. Budan bólek Qasym Qaı­senov­pen talaı ret dastar­qandas bolǵanyn tilge tıek ete otyryp, óz aýzynan estigen qyzyq­ty áńgimelerimen bó­listi.

Jıyn barysynda sóz alǵan Ulttyq mýzeı dırektorynyń orynbasary Maral Baltyshev sol kezeńdegi jurttyń qaı­ǵy­dan qan jutqan kúnderi, Otan úshin ot keship, janyn bergen batyrlardyń erligi bizdiń de, keler urpaqtyń da máńgilik jadynda bolatynyn aıtty.

– Uly Jeńiske qol jetkiz­gen qazaq jaýyngerleri bolatyn. Olar Qasym Qaı­senov, Ba­ýyrjan Momysh­uly, Reıh­stagqa alǵash bolyp tý tikken Raqymjan Qoshqarbaev sekildi batyrlar edi. Partızan Qasym Qaısenovtiń týǵanyna bıyl 100 jyl tolyp otyr. Onyń eńbekteri men erlikterin nası­hat­taý barshamyzǵa paryz dep bilemin, – dedi Maral Bal­tyshev.

Jıyn barysynda «Dala ór­nekteri» atty Otan qorǵaý­shylarǵa arnalǵan jáne «Soǵys jyldaryndaǵy qa­zaq­­stan­dyqtar» degen ta­qyrypta kitap kórmesi uıym­dastyryldy. Budan bólek jaýyngerlerdiń medaldary, qarýlary, ustaǵan zattary jeke kórme retinde tanystyryldy.

Aıan ÁBDÝÁLI, 
«Egemen Qazaqstan»