«Baýyrjan» qorynyń sporttyq jobalar jetekshisi Aınur Sálimbaevanyń aıtýynsha, álemniń myqty degen fýtbol klýbtaryn kórý múmkindigi tek qana elimizdiń iri qalalarynda ǵana emes, sonymen qatar basqa aımaqtarynda da balalar men jasóspirimder arasyndaǵy fýtboldyń damýyna yqpal etpek.
– Álemniń myqty degen fýtbol klýbyna joldama alý – Qazaqstan balalar úıiniń tárbıelenýshilerine osymen altynshy jyl qatarynan berilip otyrǵan múmkindik. Alty jyl ishinde «Armanyńa jaqynda» jobasy 11-14 jas aralyǵyndaǵy 2 myńǵa jýyq jasóspirimdi fýtbolǵa baýlyp, onyń ishinde 56 jas oıynshynyń armany oryndalyp, teńbil doptaǵy óz kýmırlerimen kózbe-kóz júzdesti. Álemniń «Mılan», «Barselona», «Chelsı», «Bavarııa», «Atletıko» syndy myqty klýbtar oıynshylarymen kezdesti. Endi biz tórt jyldan beri balalardyń jigerin jasytpaı, armandarynyń oryndalýyna kómegin aıamaı kele jatqan «Sesnabankpen» birlese otyryp, bıylǵy chempıonattyń bastalýyn habarlaımyz, – deıdi Aınur Sálimbaeva.
Al Qazaqstan fýtbolynyń ardageri, «Qaırat» FK fýtboldy jappaı damytý basshysy Quralbek Ordabaev jańa býynǵa úlken úmit artatynyn jáne jasóspirimder arasyndaǵy sportqa degen úlken qyzyǵýshylyq baryn aıtady.
Uıymdastyrýshylar sonymen qatar balalar úıiniń tárbıelenýshileri arasynda sportty dáripteýdiń mańyzdylyǵyn sol «Armanyńa jaqynda» týrnıriniń 60-qa jýyq qatysýshysy Qazaqstannyń kásibı fýtbol klýbtarynda jattyǵyp, oınaıtynyn atap ótti.
– Máselen, byltyrǵy Pavlodar oblysyndaǵy irikteý oıyndarynda bizdiń týrnırge qatysqan Vlad Kozarenkony elimizdiń eńbek sińirgen jattyqtyrýshysy Vıktor Iаryshev baıqaýǵa shaqyrdy. Búginde Vlad Pavlodar qalasynyń fýtbol akademııasynda jattyǵady. Aldyńǵy jyldardyń qatysýshylary – «Tańsholpan» balalar úıiniń 4 tárbıelenýshisi «Shahter» klýbynyń akademııasynda oınaıdy, – dedi Aınur Sálimbaeva.
Aınash ESALI,
«Egemen Qazaqstan»
ALMATY
