Taǵylymy mol kezdesýge Almaty qalasynda turatyn soǵys jáne tyl ardagerleri kelip, qasiretti kúnderdiń aýyr estelikterin ańyzdaı áńgimeledi. Qala mektepterinen arnaıy kelgen búldirshinder qamkóńil qarııalarǵa gúl shoqtaryn usynyp, óz ónerlerin pash etti. Sondaı-aq, jınalǵan qonaqtar murajaıdaǵy «Qazaqstan Uly Otan soǵysy jyldarynda» ekspozısııasymen keńirek tanysyp, jyldar jylnamasyna qanmen jazylǵan qaterli soǵys tarıhyna bir sát úńilgendeı boldy.
Kesh sońy Ulttyq Qaýipsizdik Komıteti shekara qyzmeti akademııasynyń sarbazdary, Koreı mádenı ortalyǵy, «Aıajan» Medısına kolledji ónerpazdarynyń, M.Iý. Lermontov atyndaǵy memlekettik akademııalyq orys drama teatry men T. Júrgenov atyndaǵy Qazaq Ulttyq О́ner Akademııasy artısteriniń oryndaýyndaǵy merekelik konsertke ulasty. Onda shyrqalǵan patrıottyq áýender jastardy erlik rýhqa tárbıeleı tústi. Sondaı-aq qaıyrymdylyq is-sharaǵa demeýshilik tanytqan kásiporyndar ardagerlerge tolymdy tartý-taralǵylaryn usyndy.
«Jeńis kúni – jan aıamaı elin qorǵaǵan erjúrek batyrlarymyzdy eske alý merekesi. Asaý ýaqyt tizginin aýyzdyqtaı almaısyń – jyldan-jylǵa adamzattyń basyna alapat qasiret túsirgen zulmat soǵys jaıly baıandaıtyn Uly Otan soǵysy ardagerleriniń qatary sırep barady. Ardagerlermen júzdesý óskeleń urpaqtyń elimizdiń ótken tarıhyn tereńirek zerdeleýine yqpal etip, olardyń boıynda azamattyq sana-sezim, qazaqstandyq potrıotızmdi qalyptastyrý, Otansúıgishtikke, qashanda el múddesine qyzmet etýge laıyq bolýǵa tárbıelep, ardagerlerge qurmet kórsetip, alǵys sezimin bildirýge múmkindik beredi» – deıdi mýzeı dırektorynyń orynbasary Beıbitqalı Qaqabaev.
Qaıyrymdylyq baǵytqa den qoıǵan shara uıymdastyrýshylary mundaı júzdesýlerdi tek mereke kúnderi ǵana emes, udaıy ótkizip turýǵa nıetti ekendikterin bildirdi. Keleli kezdesýge kelgen maıdangerler men tyl ardagerleri ózderine kórsetilgen syı-qurmetke dán rıza bolyp, máz-meıram bolyp tarqasty.
Arman OKTIаBR,
«Egemen Qazaqstan»
ALMATY
