Nursultan Nazarbaev Mahathır Mohamadty Parlament saılaýynda «Úmit alıansy» koalısııasynyń jeńiske jetýimen jáne Malaızııa Premer-Mınıstri laýazymyna taǵaıyndalýymen quttyqtady.
«Saılaý nátıjeleri Sizdiń parasatty basshylyǵyńyzben Malaızııanyń keleshekte jańa belesterdi baǵyndyratynyna halyqtyń senim artyp otyrǵanyn kórsetti. Buǵan Sizdiń 1981-2003 jyldarda Malaızııanyń qarqyndy damýyna qosqan ólsheýsiz úlesińiz dálel bola alady.
Qazaqstan men Malaızııa arasyndaǵy dostyq qarym-qatynas jyldan jylǵa nyǵaıyp, jan-jaqty órkendep keledi», – delingen jedelhatta.
Sondaı-aq, Memleket basshysy eki el arasyndaǵy jemisti yntymaqtastyqtyń odan ári damı beretinine senim bildirdi.
Sońynda Nursultan Nazarbaev Mahathır Mohamadqa jaýapty laýazymda tabys, al Malaızııa halqyna beıbit ómir men baq-bereke tiledi.
