Aıtyp kelmeıtin tabıǵat apaty eń áýeli Aıagóz qalasynyń turǵyndaryn áýrege salǵan edi. Qas-qaǵym sátte 143 úı sý astynda qalyp, keıin onyń 51-i jaramsyz dep tanylyp, ózge turýǵa jaramdy baspanalarǵa jóndeý jumystary bastalǵan-dy. Búginde úıleri qırap, baspanasyz qalǵan 51 otbasynyń 34-ine jańa páterdiń kiltteri tabystalypty. 47 úıde jóndeý jumystary aıaqtalyp, turǵyndar shańyraqtaryna qaıta oralypty. Qalǵan 26 úıde jóndeý jumystary jaqynda aıaqtalmaq. «11 naýryz kúngi jaǵdaıdy esime de alǵym kelmeıdi. Shynyn aıtqanda, memleket, jurtshylyq tarapynan munshalyqty kómek bolady dep oılaǵan joqpyz. Isher asymyz ben páterdiń aqshasyn bárin tólep jatyr. Kómir túsirip berdi. Qudaıǵa shúkir, qazir sý kirgen baspanamyzǵa jóndeý jumystary júrgizilip jatyr», – deıdi Aıagóz qalasynyń turǵyny Rázııa Omarǵalıeva. «Qazir jaǵdaıymyz jaqsy, memleket bergen 4,5 mıllıon teńgege unaǵan úıimdi aldym», – deıdi úsh balanyń ákesi, tasqyn kezinde baspanasy túgi qalmaı qıraǵan turǵynnyń biri Qanat Janpeıisov.
Kóktemgi tasqynnan Zyrıan aýdanynda 414 úı zardap shegip, 60 úı jaramsyz, onyń 31-i apattyq dep tanylǵan edi. Oblys ákimi baspasóz qyzmetiniń bergen málimetterine súıensek, qazir aýdanǵa 150 mıllıon teńge qarjy bólinip, 360 baspanaǵa jóndeý jumystary júrgizilip jatyr. Jaqynda aýdanǵa jumys saparymen barǵan oblys ákimi Danıal Ahmetov búlingen úılerdi 20 mamyrǵa deıin jóndep, bitirýdi tapsyrǵan-dy. «Merdigerler jaqsy jumys istep jatyr. Qalalyq máslıhat tarapynan baqylaý bar. Turǵyndardyń kóńil kúıleri jaman emes, júrgizilip jatqan jumystarǵa rızashylyqtaryn bildirýde. Qalyptasqan jaǵdaıǵa túsinistikpen qarap, qoldarynan kelgen kómekterin kórsetken Zyrıan aýdanynyń turǵyndaryna alǵysymdy bildiremin. Bıyl aýdan úshin túbegeıli ózgeris jyly bolady. Shamamen 700 mıllıon teńge qarajat bólip, Zyrıanda ınsýlt ortalyǵyn ashamyz. Bul óńirlik ortalyq bolady. Iаǵnı, zyrıandyqtardan bólek Katonqaraǵaı men Kúrshim aýdandarynan da turǵyndar osynda keledi. Sonymen qatar qalanyń jolyn asfalttaýǵa 300 mıllıon teńge bóldik», – degen-di aımaq basshysy.
Búginde Glýbokoe aýdanynda da apat saldaryn joıý jumystary jalǵasýda. Predgornoe, Progress, Altaı aýyldary men Beloýsovka kentindegi sý basqan úılerdi qalypqa keltirýmen 12 merdiger aınalysyp jatyr. Bul aýdanda 150-den astam úı sý astynda qalyp, 197 otbasy qaýipsiz jerge kóshirilgen-di. «Alǵashynda gúr etip kelgen topan sý eseńgiretip tastaǵany ras. Ne isterimizdi bilmeı sabyldyq. Sol kezde kórshi-qolańnyń, aýdan basshylarynyń qolushyn sozǵany qýantty. Al qurylysshylardyń jumystarynda min joq. Shamalary kelgenshe jóndep-aq jatyr», – deıdi Glýbokoe kentiniń turǵyny Georgıı Ivanov. Mundaǵy jóndelip jatqan úılerdiń sapasyn qojaıyndarynan bólek qoǵamdyq keńes músheleri de qadaǵalap júr. Máselen, G.Ivanovtyń úıindegi jóndeý jumystaryn Y.Altynsarın atyndaǵy orta mekteptiń dırektory, aýdandyq máslıhat depýtaty Gúlmıra Mamyrbekova baqylaýyna alypty.
«Oblys ákimi bizge birneshe ret keldi. Jergilikti ákimdik qyzmetkerleri de jaǵdaıymyzdy estı sala birden jetti. Úıimde jóndeý jumystary aıaqtalaıyn dep qaldy. Jalpy atqarylǵan jumysqa oń baǵa beremin. О́ńir basshylyǵy sózinde turdy dep aıta alamyn», – deıdi Glýbokoe aýdanynyń turǵyny Ivan Kolesnıkov. Keıbir úıdiń ıeleri «ákimdik qashan jóndep beredi?» dep qol qýsyryp otyrmaı, ózderi de bilek sybanyp jumysqa kirisip ketipti. Glýbokoe kentiniń turǵyny Esimbek Jaqan tipti aýlasyna kıiz úı tigip tastap, bala-shaǵasymen sonda turyp jatyr. «Qazir úıdiń peshin qalap jatyrmyz. Qurylysshylarǵa, aýdan basshylaryna, mektep muǵalimderine rahmet. Tıisti kómektiń bárin alyp otyrmyz. О́zim de jumystyń basy-qasynda júrmin», – deıdi ol.
Qazirgi ýaqytta aýdanda tasqynnan zardap shekken 98 úıge jóndeý jumystary júrgizilip jatsa, 50 úıdiń jóndeý jumystary aıaqtalypty. Mundaǵy jóndeý jáne qalpyna keltirý jumystaryna 110 mıllıon teńge qarjy bólinipti. «Dál qaı kúni, qaı sátte, qaı tustan soǵaryn bilmesem de tasqyn sýdyń bir qater týdyratynyn aldyn ala ishim sezgen. Nege deısiz ǵoı? Sebep mynada: jalpy orystar men qazaqtardyń aýyl bolyp qonystanýy men aýyl turǵyzý fılosofııasynda tirlikterine negizdelgen erekshelikter bar. Máselen, qazaqtar aýyldy qyrǵa, bıikteý tusqa salady.
Maldaryn oı men qyrǵa jaıyp jiberip, solardy baqylap otyrýǵa qolaıly bolsyn degeni. Al orystar jemis-jıdek, baý-baqsha ósirýge yńǵaıly jer izdeıdi. Jylǵa, saı-saladaǵy bulaq-ózen boılaryna, ylǵaly moldaý jerlerge qonystanady. Baıqap otyrsańyzdar, myna bizdegi tasqynǵa urynǵan bes aýyl da jylǵa-qolatta, ózenge tym jaqyn jatyr. Degenmen bolar is boldy. Bizderge zaýal tóngende qolma-qol kómekke kelgen muqym oblys halqyna, der kezinde kómek qolyn sozǵan, tek sozyp qana qoımaı, oblys deńgeıindegi mekemelerdi osy sharýaǵa jumyldyrýǵa ıgi yqpal etken oblys ákimine, búgingi kúni jóndeýmen arpalysa shuǵyldanyp jatqan seriktestikterge, bizben tize qosyp birge qımyldaǵan, jaǵdaıdy túsine bilgen aýdan jurtshylyǵyna alǵys aıtqym keledi», – deıdi Glýbokoe aýdanynyń ákimi Qalıhan Baıǵonysov.
Azamat QASYM,
«Egemen Qazaqstan»
Shyǵys Qazaqstan oblysy
