Sýretti túsirgen Erlan OMAR, «Egemen Qazaqstan»
Memleket basshysy AEF-tyń dástúrli túrde ótip kele jatqanyn aıta kele, qazirgi tańda álemde kezdesetin mańyzdy máselelerge toqtaldy.
«Astana ekonomıkalyq forýmyna qatysý jaqsy dástúrge aınalyp keledi. Osy oraıda osynda kelgen qonaqtarymyzǵa, jalpy bizdiń azamattarǵa zor rahmetimdi aıtamyn. 11-shi ret ótkizilip otyrǵan forým álemdik ekonomıkanyń ınvestısııalary men ınnovasııalarynyń eń mańyzdy máselelerin talqylaý alańy bolyp otyr. Byltyrǵy forýmnan beri biz álemdegi orasan zor ózgeristerdiń kýágeri boldyq. Jańadan teketires, konfrontasııalar paıda bolýda, memleketter arasynda kelisimge kelý qıyndap barady. Ásirese, úlken memleketter arasynda ózara senimsizdik, qarsylastyqtyń ustanymyn túsinýge talpynbaý jıi kezdesedi. Bul álem úshin óte kúrdeli kezeń», dedi Elbasy.
Sondaı-aq N.Nazarbaev osyndaı keleńsizdikterge qatysty túıtkilderdi obektıvti túrde talqylaýdyń mańyzy zor ekenin atap ótti.
«Sol sebepten bıylǵy forým jahandyq syn-tegeýrinderge tıimdi jaýap izdeýge baǵyttalǵan. Sáıkesinshe, forýmda osy salalardaǵy bilikti mamandar jınalyp otyr. Olardyń sózin tyńdaýǵa, usynystaryn paıdalanýǵa ázirmiz», dedi Prezıdent.
Mádına Jálelqyzy,
«Egemen Qazaqstan»
