QR Tuńǵysh Prezıdenti Qory Qazaqstannyń barlyq óńirlerinde jastarmen belsendi jumys atqarady. 2017 jyldan bastap Qordyń ókilderi elimizdiń barlyq óńirlerine baryp, stýdentterdi Qordyń qyzmetimen, jastarǵa arnalǵan jobalarymen tanystyrýda.
Dástúr boıynsha sapar jergilikti ákimdiktiń basshylyǵymen kezdesýmen bastaldy. Tarazda QR Tuńǵysh Prezıdenti – Elbasy Qory atqarýshy dırektorynyń orynbasary Sultan Aıtjanov Jambyl oblysy ákiminiń orynbasary Erqanat Manjýovpen kezdesti. Resmı kezdesýde jastar saıasatyn damytý máselesi, sondaı-aq mádenıet, ǵylym jáne áleýmettik salalardaǵy birlesken jobalar talqylandy.
QR Tuńǵysh Prezıdenti – Elbasy Qory atqarýshy dırektorynyń orynbasary Sultan Aıtjanov: «QR Tuńǵysh Prezıdenti Qorynyń josparynda jastardy qoldaýǵa, qazaqstandyq kreatıvti jáne básekege qabiletti ǵylymı qaýymdastyqty qalyptastyrýǵa baǵyttalǵan kóptegen jobalar bar, onyń negizin bolashaqta stýdentter men joǵary oqý oryndarynyń túlekteri quraıdy. Bul jobalar Prezıdenttiń Joldaýynda qoıylǵan mindetterge sáıkes ázirlenip iske asyrylady».
Ákimdiktiń ókilderimen kezdeskennen keıin, Qordyń basshylyǵy men ujymy M.H.Dýlatı atyndaǵy Taraz Memlekettik ýnıversıtetiniń (TarMÝ) ǵylymı jáne stýdenttik aktıvimen kezdesti, onda Qordyń jastarǵa arnalǵan jobalary týraly áńgimele qozǵaldy. TarMÝ-dyń jas ǵalymdary men stýdentteri Qordyń qyzmetimen tanys ekeni qýantady. TarMÝ-dyń 30-ǵa jýyq stýdenti Qordyń ártúrli jyldardaǵy stıpendıattary bolǵan. Bıyl QR Tuńǵysh Prezıdenti Qorynyń osymen onynshy ret ótkizilip otyrǵan jaratylystaný, tehnıkalyq jáne gýmanıtarlyq ǵylymdar boıynsha "Bolashaq ǵalymdar" atty stýdentterdiń úzdik ǵylymı jumystarynyń baıqaýynyń jeńimpazdary bolyp TarMÝ-dyń eki stýdenttik komandasy atandy.
QR Tuńǵysh Prezıdenti Qory janyndaǵy Ǵylym boıynsha Keńestiń múshelerinen turatyn konkýrstyq komıssııanyń sheshimimen TarMý stýdentteri Dıamýrshaev Islam, Samoılenko Nıkıta, Tuman Baǵjan (Munaı, gaz jáne mehanıka fakýlteti) «Taraz qalasynyń qıylysyndaǵy ekologııalyq problemalardy sheshý» taqyrybyndaǵy eńbekteri, sondaı-aq Maırova Janerke, Anııarbekova Qymbattyń (Tehnologııalyq fakýltet) «Emdik qasıetteri bar trıkotaj qurylymyn jasaý jáne zertteý» taqyrybyndaǵy eńbekteri úzdik dep tanyldy.
TarMÝ-daǵy kezdesý barysynda smartfondar men planshetterge arnalǵan latyn qarpi bar «Qazaq Latyn Keyboard» qazaq pernetaqtasy jobasynyń tusaýkeseri ótti. Sonymen qatar QR Tuńǵysh Prezıdenti – Elbasy Qorynyń qoldaýymen ázirlengen qazaq tilin oqytatyn «Soyle.kz» onlaın-kýrsy, «Kim bilgir» mobıldi ıntellektýaldyq oıyny, «Abaialemi.kz» onlaıyn ensıklopedııasy, «Qazaqstan3D» veb-saıty jáne mobıldi qosymshasy, «Jeti qazyna», «Moı Kazahstan», «Uly tulǵalar», «Prazdnıkı Kazahstana» mobıldi qosymshalary týraly maǵlumat berildi.
Tarazdyq stýdentter Qor ókilderi men áriptesteriniń sheberlik sabaqtaryna qatysty. QR Tuńǵysh Prezıdenti – Elbasy Qorynyń baspasóz qyzmetiniń basshysy Aqerke Berlibaı "Áleýmettik medıa: SMM-niń úzdik tájirıbesi jáne sıfrlanǵan álemdegi PR» taqyrybynda sheberlik sabaǵyn ótkizdi.
QR Tuńǵysh Prezıdentiniń Qory elimizdiń daryndy stýdentterine úzdik mamandar ındýstrııasynyń kásibı IT-oqytý kýrsynan tegin bilim alýǵa jáne óz startaptaryn dúnıejúzilik rynogqa shyǵarýǵa múmkindik beretin «Smart Zholy» jáne «Method PRO» sııaqty jobalardy iske asyrýda.
Bıylǵy jyly Qor «Blokcheın» sıfrlyq marafony jobasyn ázirledi. Qor blokcheın, krıptovalıýta, maınıng, ICO jáne basqa da zamanýı IT-trendter boıynsha túsinikteme jumysyn júrgizý úshin qoǵamdyq alańdy qurýdy josparlap otyr. Jobanyń maqsaty - qoǵamnyń bilimin arttyrý, ásirese jastardy zamanaýı IT-tehnologııalarǵa baýlý. Osyǵan baılanysty otandyq «FinTech Group» kompanııasynyń ókilderi stýdentterge «blokcheın» tehnologııalary týraly semınar ótkizdi.
Jambyl oblysyndaǵy QR Tuńǵysh Prezıdentiniń kúnderi "Balasaǵun" ortalyq konsert zalynda Qazaqstannyń opera juldyzdarynyń – Qordyń syılyǵynyń laýreattarynyń gala konsertimen aıaqtalady. Azamat Jyltyrkózov (barıton), Bıbigúl Januzaq (soprano), Marat Aıtimbaı (barıton), Gaýhar Tasbergenova (fortepıano), Ermek Qurmanaev (vıolonchel), Qalamqas Jumabaeva (skrıpka) sııaqty óner maıtalmandary óz sheberligin kórsetedi. Kirý tegin.
Konsert Astananyń 20 jyldyǵyna arnalǵan «Astana - Uly dalanyń jaýHary» atty fotokórmesimen jalǵasady. QR Tuńǵysh Prezıdenti uıymdastyrǵan bul fotokórme Máskeý, Sankt-Peterbýrg, Madrıd, Astana jáne Almaty qalalarynda ótti. Bolashaqta London, Berlın, Beıjiń jáne Parıjde ótpek.
Joldybaı Bazar,
“Egemen Qazaqstan”
