«Búgingi kún sizderdiń ómirlerińizdegi tarıhı kún. Áskerı ant qabyldaı otyryp, Sizder bizdiń Táýelsiz Qazaqstanymyzdyń Otan qorǵaýshylary boldyńyzdar. El senimin aqtaý - árbir áskerı qyzmetshiniń qurmetti de qasıetti boryshy. Elimizdiń júz myńdaǵan ul-qyzdary Uly Otan soǵysy jyldarynda bizderge úlgi bolarlyq qaıtalanbas, máńgi óshpes erlik kórsetti. Búgingi tańda bizder batyrlarymyz - Saǵadat Nurmaǵambetov, Talǵat Bıgeldınov, Baýyrjan Momyshuly, Álııa Moldaǵulova, Mánshúk Mámetova jáne taǵy da basqalardyń esimderin maqtanyshpen aıtamyz. Olar da osylaı Otanǵa adal bolýǵa ant qabyldap, óz áskerı jaýyngerlik mindetterin tabandylyqpen oryndady. Osynaý batyrlardyń Otanǵa degen sheksiz súıispenshilikteri Sizder men bizder úshin naǵyz úlgi, qurmetti jaýyngerler», - dedi 27943 áskerı bóliminiń komandıri, podpolkovnık Murat Arapbaev óziniń quttyqtaý sózinde.
Saltanatty shara barysynda Shyǵys Qazaqstan oblysy boıynsha Qarýly Kúshter ardagerleri keńesiniń tóraǵasy, zapastaǵy podpolkovnık Tóken Bilálov, «Shyǵys» óńirlik qolbasshylyǵy áskerler qolbasshysynyń atynan polkovnık Vıtalıı Borısovıch pen jas sarbazdar ata-analarynyń atynan Erlan Zaýyrbekovtyń anasy Jansaıa Asqarqyzy men Birjan Nurjanulynyń ákesi Nurjan Ábenuly quttyqtaý sóz sóıledi. Qyzylorda oblysynan shaqyrylǵan qatardaǵy Birjan Nurjanuly jas sarbazdar atynan lebizin jetkizip, ofıserler men serjanttarǵa alǵysyn aıtty.
Márııa Shaıhıslamova sonaý Qyzylorda oblysy Shıeli aýdany Tájibaı aýylynan Áskerı ant qabyldaý rásimin kórýge arnaıy kelipti. «Bul – áskerı boryshyn óteýge kelgen alǵashqy nemerem. Taıaq ustap júrsem de kelip otyrmyn. Komandırleriniń sarbazdarǵa degen qamqorlyǵyn kórip, kóńilim ornyna túsip, qýanyp otyrǵan jaıym bar. Nemereme elin, jerin abyroımen qorǵasyn degen tilek aıtamyn. Basqa da sarbazdarǵa sáttilik tileımin», - deıdi 73 jastaǵy apamyz.
Málik Sozaqbaev nemeresi Tamerlan Shansharovtyń ant qabyldaý rásimine qatysý úshin Almaty oblysy Qapshaǵaı qalasynan jetipti. «Áskerı ant qabyldaý ár sarbazǵa zor jaýapkershilik júkteıdi. Sarbazdar qabyldaǵan Antyna berik bolsyn deımin. Babalarymyz aq bilektiń kúshimen, aq naızanyń ushymen qorǵaǵan jerimizdi abyroımen qorǵasyn deımiz. Bul áskerı bólimniń motoatqyshtar batalonynda 1975-1977 jyldary ózim de áskerı boryshymdy ótegenmin. Árıne, ol kezde zaman basqa edi. Odan beri qansha jyl ótti. Qazir bári ózgergen. Sarbazdarǵa barlyq jaǵdaı jasalǵan», - deıdi ol.
27943 áskerı bóliminiń ıdeologııalyq jumystar, arnaıy nasıhat jáne memlekettik – quqyqtyq daıyndyq boıynsha aǵa ofıseri, kapıtan Nurjan Malǵajdarov jas sarbazdardy áskerı ómirge beıimdep, ár baǵyttaǵy jaýyngerlik, saptyq daıyndyqtardan ótkizý áskerı bólim komandıriniń tárbıe jáne ıdeologııalyq jumystar jónindegi orynbasary, podpolkovnık Asyl Erǵalıevke júktelgenin aıtady. «Jıyn ákimshiliginiń ofıserler men serjanttar quramy jas sarbazdardy tárbıelep, áskerı qyzmettiń qyr-syrlaryn úıretýde óz qyzmettik mindetterin durys atqara bildi. Atap aıtqanda, memlekettik til saıasatynyń jarqyn úlgisi retinde jıyn basshysynyń tárbıe jáne áleýmettik-quqyqtyq jumystar jónindegi orynbasary, kapıtan Murat Sábıtov sarbazdarǵa Áskerı ant mátinin memlekettik tilde jattap oqýlaryn talap etse, serjant Dýlat Qadyrbekov, 2 synypty serjant Nurlan Qorabaev áskerı komandalardy qazaqsha berip, oryndaýdy qolǵa aldy», - deıdi ol.
Is-shara sońynda jas sarbazdar jeke quramy qysqa merzimde ózderi meńgergen qoıan-qoltyq urys jattyǵýlarynan qarýmen jáne bólimniń shtab batalony barlaý rotasy jeke quramy jaýyngerlik urys, oqý-taktıkalyq jattyǵýlarynan kórsetilimderdi jáne áskerı orkestr jeke quramy defelesin qonaqtar nazaryna tartý etti.
Azamat Qasym,
«Egemen Qazaqstan»
О́SKEMEN
Sýretti túsirgen Nurjan Malǵajdarov
