Elordanyń 20 jyldyǵyna oraı uıymdastyrylǵan sharada Astana qalasy ákimdiginiń jobalary, ınnovasııalyq ıdeıalar tanystyryldy. Astana qalasy ákimdiginiń túrli basqarmalary men qurylymdyq bólimsheleriniń ókilderi Atyraýǵa jumys saparymen keldi. Atyraý oblysynyń ákimi Nurlan Noǵaev pen Astana qalasy ákiminiń orynbasary Ermek Amanshaev iskerlik maqsatta kezdesý ótkizip, aldaǵy maqsat-mindetterdi aıqyndady.
– Astana – Qazaqstannyń barlyq qalalaryna úlgi, – dedi qonaqtardy qarsy alǵan Nurlan Noǵaev. – Álemdik strategııalyq mindetterdi sheshý úshin kóptegen elderdiń birinshi basshylary Astanaǵa arnaıy keledi, aýqymdy sharalar ótedi. Medısınanyń, ǵylym men bilimniń barlyq mańyzdy nysandary elordada shoǵyrlanǵan. О́ńirdi damytý boıynsha Astanadan kóp tájirıbe alýǵa nıettimiz.
Bıznes-forýmda aımaq basshysy elimizdiń áleýmettik-ekonomıkalyq damýyna yqpal etetin jańalyqtardy engizý boıynsha eki qala arasynda tájirıbe almasýdyń mańyzy zor ekenin atap aıtty. Ekonomıkany ártaraptandyrý baǵytynda júzege asyp jatqan jumystar jaqsy nátıje berip keledi. Astana qalasy ákiminiń orynbasary Ermek Amanshaev jıyrma jyldyq tarıhynda bas shahar biraz tájirıbe jınaǵany jaıly baıandady. Arnaıy delegasııa Astana kúni merekesi qarsańynda barlyq oblystardy aralap, brend-jobalaryn tanystyrýdy qolǵa alǵan.
Atyraýmen óńiraralyq yntymaqtastyq ónerkásip, aýyl sharýashylyǵy, kásipkerlik, týrızm, sıfrlandyrý, «Aqyldy qala» tehnologııasyn engizý baǵyttary boıynsha júzege aspaq. Bıznes-forým aıasynda Astana qalasy ınvestısııalar jáne kásipkerlik basqarmasy basshysynyń orynbasary Erlan Bekmurzaev elordanyń damý strategııasy týraly baıandama jasady. Forým jumysyna qatysqan atyraýlyq isker azamattar da ıgi iske jumyla kirisýge múddeli ekenderin jasyrmady. Mysaly, Qazaqstanda balamasy joq ámbebap saýda ortalyǵy, «Nurly jer» baǵdarlamasy boıynsha salynatyn sáýletti turǵyn úı kesheni, tórt myńǵa jýyq oqýshyny qabyldaı alatyn mektep kesheni men «Aqyldy qala» jobalary kásipkerler tarapynan qyzyǵýshylyqqa ıe boldy. «Aqyldy qala» jobasy boıynsha Atyraýda da júıeli jumystar júzege asýda. Oblys ákimi Nurlan Noǵaev bul rette azamattyq belsendilik basty ról atqaratynyn atap ótti. Qaýipsizdikti saqtaý maqsatynda Atyraý qalasyndaǵy barlyq kóshelerge beınekameralar ornatylyp jatyr.
Astana qalasy ınvestısııalar jáne kásipkerlikti damytý basqarmasy basshysynyń orynbasary Erlan Bekmurzaev bas shaharda 20 jylda tabysty iske asqan jobalardy óńirlerge taratý maqsatynda jumystanyp jatqandaryn aıtty. «Atyraýlyqtar ásirese eki jobaǵa qyzyǵýshylyq tanytty, onyń biri IT-qaýipsizdik salasynda, qala kóshelerine beınebaqylaý kameralaryn ornatý, ekinshisi – «1000 jańa saýda orny» jobasy. Memleket-jekemenshik áriptestigine negizdelgen bul bastamaǵa memleket qarjy salǵan joq. Saýda alańdaryna arnalǵan jer telimderin ınvestorlar usyndy, jobany iske asyrý Astanaǵa jańa ınvestısııalar tartty jáne jańa jumys oryndary quryldy», deıdi E.Bekmurzaev.
Bıznes-forým nátıjesiniń naqty qandaı bolatyny bolashaqtyń enshisinde, aımaqaralyq yntymaqtastyqty nyǵaıtýǵa baǵyttalǵan qadamdar el ıgiligin eseleýdiń alǵysharty bolary sózsiz.
Baqytgúl BABASh,
«Egemen Qazaqstan»
ATYRAÝ
