«Zań jobasy «Qazaqstan Respýblıkasynyń Prezıdenti týraly» Konstıtýsııalyq zańynyń otyz úshinshi babyna sáıkes ázirlendi. Zań jobasy Qazaqstan Respýblıkasy Qaýipsizdik Keńesiniń quqyqtyq mártebesin, quzyretin jáne qyzmetiniń uıymdastyrylýyn aıqyndaıdy. Osylaısha, Zań jobasymen Qaýipsizdik Keńesin úılestirýshi konstıtýsııalyq organ retinde taný usynylady», -dedi zań jobasy boıynsha baıandama jasaǵan Ádilet mınıstri Marat Beketaev.
Jalpy, qujat úsh taraýdan turady. Birinshi taraý Qaýipsizdik Keńesiniń quqyqtyq mártebesin, qyzmetiniń negizderin, mindetteri men fýnksııalaryn aıqyndaıdy. Atap aıtqanda, Qaýipsizdik Keńesiniń mindetterine: eldiń ulttyq qaýipsizdigin, qorǵanys qabiletiligin qamtamasyz etý boıynsha memlekettik saıasattyń baǵyttaryn qaraý; sol baǵyttar boıynsha memlekettik organdar men uıymdardyń qyzmetin úılestirý jatady. Sonymen qatar, Qazaqstan Respýblıkasynyń zańnamasyna jáne Qaýipsizdik Keńesi Tóraǵasynyń sheshimderine sáıkes, basqa da mindetter qarastyrylady.
«Ekinshi taraý Qaýipsizdik Keńesiniń Tóraǵasy men músheleriniń ókilettigin, Qaýipsizdik Keńesiniń qyzmetin belgileıdi. Osy oraıda, QK Tóraǵasyna kelesi ókilettikterdi bekitý usynylady: Qaýipsizdik Keńesiniń qyzmetin basqarýdy júzege asyrý; onyń otyrystary men jedel keńesterin shaqyrý; Qaýipsizdik Keńesi týraly erejeni bekitý; zańnamada kózdelgen ózge de ókilettikterdi júzege asyrý. Qaýipsizdik Keńesiniń qyzmetin aqparattyq-taldamalyq jáne uıymdastyrýshylyq jaǵynan qamtamasyz etýdi Qaýipsizdik Keńesiniń Tóraǵasyna baǵynatyn jáne esep beretin Qaýipsizdik Keńesiniń Apparaty júzege asyrady», - dedi Beketaev.
Al úshinshi taraý Qaýipsizdik Keńesi men Qaýipsizdik Keńesi Apparatynyń qyzmetin qarjylandyrý máselelerin, sondaı-aq zańnyń kúshine ený tártibin retteıdi.
Parlament qabyldaǵan Zań Memleket basshysynyń qol qoıýyna joldanatyn bolady.
