Elimizde tuńǵysh ret buqaralyq sportty damytý boıynsha qolǵa alynyp otyrǵan jobanyń ashylý saltanatyna Parlament Senatynyń Halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva, Din isteri jáne azamattyq qoǵam mınıstri Darhan Káletaev, Aqmola oblysynyń əkimi Məlik Myrzalın, oblystyq irikteý kezeńderiniń jeńimpazdary men jastar uıymynyń ókilderi jáne birqatar tanymal sportshylar qatysyp, qatysýshylarǵa sáttilik tiledi.
«Búgin «Baldáýrende» irikteý kezeńniń jeńimpazdary jınalyp otyr. Árqaısyńyz óz óńirińizdiń úzdigisizder. Spartakıadaǵa elimizdiń 800 mektebi qatysty, endi sizder óz mektepterińizdiń, aımaqtaryńyzdyń namysyn qorǵaýǵa keldińizder. Oıyndar tartysty bolaryna senemin. Sport bul – kúsh, fızıkalyq daıyndyq, densaýlyq, jáne eń bastysy, jeńiske degen umtylys. Qarsylasty ǵana emes, óz-ózińdi jeńe bilý óneri. Sport rýhy bıik, myqty tulǵa bolýǵa jigerlendiredi. Al bizdiń elimizge mundaı tulǵalar qajet. Qazaqstannyń bolashaǵy sizderdiń qoldaryńyzda. Sondyqtan bilimdi de, salamatty ómir saltyn da meńgergen jan-jaqty azamat bolýlaryńyz kerek», dedi Darıǵa Nazarbaeva.
Jobaǵa barlyǵy 6000 oqýshy qatysqan. Olardyń 528-i «Baldáýrende» baq synaýda. «SportFEST Kazakhstan» – «Kommýnıkatıvtik bastamalar men strategııalar» jeke qory men «Samruk-Kazyna Trust» áleýmettik jobalardy damytý qorynyń alǵashqy sporttyq jobasy.
«2017 jyldyń kúzinde bastaý alǵan «SportFEST Kazakhstan» jobasy buqaralyq sport pen salamatty ómir saltyn nasıhattaýǵa baǵyttalǵan. Fınaldyq saıysty osynshalyqty aýqymdy etýimizdiń sebebi de jastardyń sportqa degen qyzyǵýshylyǵyn arttyrý men olardyń kóshbasshylyqqa, jeńiske degen yntasyn oıatý», deıdi «Kommýnıkatıvtik bastamalar men strategııalar» jeke qorynyń bas dırektory Aıbek Qazyǵulov.
Sondaı-aq Darıǵa Nazarbaeva «SportFEST Kazakhstan» jobasyn endi jyl saıyn dástúrli túrde uıymdastyrý kerek degen usynys bildirdi. «SportFEST Kazakhstan» jobasynyń negizgi maqsaty – mektep oqýshylarynyń sportqa degen yntasyn arttyrý. Iаǵnı dene shynyqtyrýdy ómirimizdiń ajyramas bóligi retinde qalyptastyrý. Osy oraıda, «SportFEST Kazakhstan» jobasyn uıymdastyrýdy jyl saıyn dástúrge aınaldyrý kerek», dep atap ótti Darıǵa Nursultanqyzy.
«SportFEST Kazakhstan» respýblıkalyq spartakıadasynyń fınaldyq kezeńine aımaqtyq irikteý oıyndarynan ótken 8-10 synyp oqýshylary qatysyp jatyr.
Álı BITО́RE,
«Egemen Qazaqstan»
Aqmola oblysy
