Osyǵan deıin dene tárbıesi sabaqtarynyń standartty júktemesin kótere almaǵandyqtan syrqat nemese múgedektikke ushyrap qalǵan balalarǵa aıryqsha kóńil bólinbeıtin. Ondaılar týabitti syrqattar men syrtqa bilinbeıtin naýqastary bar oqýshylar arasynan kóbirek shyǵyp otyrdy. Máselen, sondaıdyń kesirinen Almatynyń №118, Aqtóbeniń №41 mektebinde eki jas óskinniń qurban bolýyna jol berildi.
Densaýlyq saqtaý mınıstrliginiń málimetterine qaraıtyn bolsaq, 14 jasqa deıingi balalar arasynda qaıtys bolǵandardyń arasynda sozylmaly dertter men patologııaǵa shaldyqqandar jıi kezdesedi. Ekinshi orynda týabitti naýqastar men túrli deformasııalar. Al 15-ten18 jasqa deıingi jasóspirimder arasyndaǵy ajaldyń negizgi bóligi syrtqy dertterdiń kesirinen bolady eken.
О́kinishke qaraı, júrektiń kenetten toqtap qalýy sebebinen biz jyl saıyn 10-15 jasóspirimnen aıyrylyp kelemiz. Munyń ishinde mektep oqýshylarymen qatar kolledjder men JOO oqýshylary men stýdentter de bar.
Dárigerlerdiń aıtýyna qaraǵanda, ajalǵa sebep «Jedel járdemniń» keshigýi ǵana emes, júregi aýyrǵan adamdarǵa mańaıyndaǵylardyń alǵashqy medısınalyq kómek jasaı almaýy kórinedi. Buryn alǵashqy medısınalyq kómekti jasaýdy JOO túgil mektep qabyrǵasynda da úıretetin. Qazir ony artyq bilim retinde alyp tastaǵan.
Onyń ústine Bas prokýratýra mektepterdegi medbıke mamandardyń biliktiligi tómen, ózge túgil alǵashqy medısınalyq kómekti qalaı jasaýdy da bilmeıtin adamdar ekenin, sonymen qatar medısınalyq jaraqtardyń tapshy ekenin anyqtaǵan.
Osyǵan baılanysty biz Premer-Mınıstrdiń orynbasary Erbolat Dosaevqa depýtattyq saýal joldap, Bilim jáne ǵylym, Densaýlyq saqtaý mınıstrlikteri arasyndaǵy osy máselege baılanysty ózara is-qımyldardy jandandyrý jáne dene tárbıesi páninde jalpy júktemelerdi kótere almaıtyn naýqas balalardy anyqtap, olarǵa emdik jattyǵýlar uıymdastyrý qajettigin jetkizdik.
Artýr PLATONOV,
Májilis depýtaty
