Qazaqstan delegasııasy Qytaıdan Qazaqstanǵa qonys aýdarǵan jáne Qazaqstan Respýblıkasynyń azamattyǵyn alǵan qandastarymyzdyń jaǵdaıyna alańdaýshylyq bildirdi. Kelissózder barysynda elimizdiń ókilderi Qytaıda qos azamattyq úshin ustalǵan qazaqtardyń isterin ádil qaraý jáne olardy bosatý máselesin qozǵady. Budan bólek, jıynǵa qatysýshy taraptar Shyńjań-Uıǵyr avtonomııalyq aımaǵynda turatyn qazaqtardyń máselesin ońtaıly sheshýge ýaǵdalasty.
Osyndaı ekijaqty kelisimder atalǵan saladaǵy qordalanǵan máselelerdiń sheshimin tabýǵa aıtarlyqtaı serpin berýde.
Máselen, sońǵy ýaqytta Qytaıda turatyn qazaqtardyń túrli qıynshylyqtarǵa tap bolǵany týraly aqparat keńinen taralǵany belgili. Sondaı-aq 2018 jylǵy 29 mamyrda Beıjińde kóshi-qon zańnamasyn buzǵany jáne Qytaı aýmaǵynda zańsyz júrgeni úshin qazaqstandyq qart áıel jáne onyń uly ustalǵany jóninde jańalyq tarady. Osy oqıǵaǵa baılanysty Syrtqy ister mınıstrligi men elshilik qyzmetkerleri Qytaı quqyq qorǵaý organdarymen habarlasyp, ábjildik tanytty.
Keıinnen anyqtalǵan málimet boıynsha, 91 jastaǵy keıýana kóshi-qon zańnamasyn buzǵany jáne QHR aýmaǵynda zańsyz bolǵany úshin ustalǵan eken. Elimizdiń dıplomatııalyq qyzmetkerleri qytaılyq áriptesterimen tyǵyz baılanys ornata otyryp, ustalǵan azamattardyń elge oralýyna qatysty kelissózder júrgizdi. Aqyry, olardy Qytaı azamattyǵynan aıyrý jáne Qazaqstanǵa qaıtarý týraly mámilege qol jetkizildi.
Qytaıda Raıhan ájeı men onyń ulynan basqa da birqatar qazaqstandyq azamat tutqyndalǵan bolatyn. Osy máselege qatysty túsinikteme bergen Syrtqy ister mınıstri Qaırat Ábdirahmanovtyń aıtýynsha, elimiz tarapy azamattarymyzdyń elge oralýyna jaǵdaı jasaý maqsatynda jumys istep jatyr. Vedomstvo basshysy shetelde júrgen Qazaqstan azamattarynyń quqyǵy árdaıym qorǵalatynyn jetkizdi.
«Sheteldegi Qazaqstan azamattarynyń múddesine baılanysty barlyq jumystardy nazarǵa alyp, qol qýsyryp otyrǵanymyz joq. Kún saıyn osy máselelermen jumys isteımiz. Kelissózderdiń, Qytaımen arada qol jetkizilgen ýaǵdalastyqtardyń qorytyndysynda tutqyndalǵan 12 azamatymyzdyń 9-y bosatyldy. Qalǵan úsh azamatymyzǵa qatysty tyńǵylyqty jumystar júrip jatyr», dep túsindirdi Q.Ábdirahmanov.
Qandastarymyz Syrtqy ister mınıstrliginiń eńbegin joǵary baǵalap otyr. Máselen, Qazaqstanǵa 1993 jyly qonys aýdarǵan Nurjol Tabıǵat esimdi azamat Raıhan ájeıdiń oqıǵasynda mınıstrliktiń jedel ári tabysty áreket etkenin aıtady. Onyń pikirinshe, Syrtqy ister mınıstrligi osy máselede dıplomatııalyq qabiletiniń qarymyn pash etti.
Raıhan ájeı óz kezeginde azamattarǵa qoldaý kórsetken Qazaqstannyń Syrtqy ister mınıstrligi men Qytaıdaǵy elshilik qyzmetkerlerine alǵys aıtyp, beıneúndeý jarııalady. Beınejazbada qarııa Elbasy Nursultan Nazarbaevqa aqjarma batasyn berip, qıyn-qystaý shaqta kómek kórsetken elimizdiń dıplomatııalyq qyzmetine rızashylyǵyn jetkizdi. 91 jastaǵy keıýana 2005 jyly elge oralyp, Qazaqstan azamattyǵyn alǵan eken. Alaıda zańnan habary az bolǵandyqtan, Qytaı pasportyn qosa ustap júrgen kórinedi. Byltyr ájeı Qytaıǵa týystaryna baryp, bir jyldaı sonda turaqtap qalypty. Al 2018 jylǵy 29 mamyrda Beıjiń qalasynyń saqshylary ony jáne ulyn eldegi kóshi-qon zańnamasyn buzǵany úshin qamaýǵa alǵan.
«Sol kúni Qazaqstannyń Beıjiń qalasyndaǵy elshiligine kómek surap habarlastyq. Bizge qazaqstandyq konsýldyq qyzmetkerler tarapynan dereý kómek kórsetildi. Eki azamattyqtyń bireýin tańdaý máselesi týyndady. Sóıtip 2018 jylǵy 28 mamyrda men jáne balam Qazaqstan azamattyǵyn saqtap qalyp, Qytaı azamattyǵynan bas tarttyq. Elimizdiń dıplomatııalyq qyzmetkerleri tıisti kómek kórsetip, bizdi dalada qaldyrǵan joq. Elge qaıtýyma atsalysqan, mendeı qarııany dalada qaldyrmaı kómek qolyn sozǵan qyzmetkerge rahmet aıtamyn. Osyndaı azamattardy ósirgen qazaq eline, mınıstr myrzaǵa alǵysym sheksiz. О́mir jasyńyz uzaq bolsyn!» dep aǵynan jaryldy Raıhan ájeı.
Raıhan ájeıdiń oqıǵasynyń ońtaıly sheshilýi eki memleket arasyndaǵy dıplomatııalyq qarym-qatynastyń deńgeıi joǵary ekenin kórsetedi. Áıtpese mundaı máseleniń oń sheshimin tabý ońaı sharýa emes.
Abaı ASANKELDIULY,
«Egemen Qazaqstan»
