Sondaı-aq ataýly jyl IT-balalar álemi, salamatty bolashaq jáne jetim balalardy qoldaý jónindegi úsh tuǵyrdan turady. Osy oraıda robottehnıka ortalyqtaryn jabdyqtaý isi qolǵa alynyp, 150 sport jáne oıyn alańdary jabdyqtalý ústinde. Qazirgi kezde aımaqta «Ásem» jyl boıy oqý-saýyqtyrý lageriniń, sal aýrýyna jáne aýtızm dertine shaldyqqan balalarǵa arnalǵan ortalyqtardyń qurylysy qarqyndy júrgizilýde. Joǵaryda atap ótkendeı, jyl basynda oblys ákimi B.Saparbaev «Baqytty bala» jobasyna sáıkes júrgiziletin san alýan is-sharalardyń basym bóligi 1 maýsym – halyqaralyq balalardy qorǵaý kúnine deıin saltanat quratynyn jetkizgen-di. Solaı boldy da. Sóz ben istiń birligine budan artyq mysaldy taýyp aıtýdyń ózi qıyn. Aıtalyq atalǵan joba balalardyń aldynda turǵan barlyq ózekti máselelerdi sheshýdi kózdese, osy istiń údesinen shyǵý úshin bes aıda bes jylǵa tatyrlyqtaı is tyndyryldy desek, artyq kete qoımaspyz. Ásirese keleshek urpaq ókilderiniń jan-jaqty ári úılesimdi túrde damýyna negiz qalanǵany úlken mereı. Jyl basynan bergi ótkizilgen 600-den astam is-shara osy arnaǵa baǵyttaldy.
«Baqytty bala» jobasynyń basty tarmaǵynyń biri balalardyń jazǵy demalysyn utymdy túrde uıymdastyrýǵa arnalǵan. Bul jóninde oblysta tıimdi sharalar qabyldanǵan. Osy oraıda birinshi kezekte múgedek balalardyń alańsyz em alýy men dem alýyna basymdyq berilgen. «Kúnshýaq» balalardy saýyqtyrý lageriniń negizinde onyń keıbir mysaldary gazetimizdiń ótken nómirleriniń birinde jazyldy da. Atalǵan tizimdi turmysy tómen, az qamtylǵan otbasynan shyqqan balalar tolyqtyra túsedi. Budan keıingi kezekte respýblıkalyq jáne halyqaralyq baıqaýlar men olımpıadalardyń jeńimpazdary men júldegerleri tur.
Keshegi 1 maýsym kúni oblys ortalyǵynda ótkizilgen balalardyń «Sálem saǵan, Astana!» atty merekelik sherýi kezinde myńǵa jýyq balaǵa demalýǵa jáne ekskýrsııaǵa shyǵýǵa joldama tabystaldy. Soǵan sáıkes olar Tatarstan men О́zbekstannyń kıeli de kórkem jerlerimen tanysa alady. Sonyń ishinde oblystaǵy jetkinshekterdiń belgili bir bóligi Reseıdiń Orynbor oblysyndaǵy jyl boıy jumys jasaıtyn lagerde demalatyn bolsa, 500-ge jýyq bala Shyǵys Qazaqstan oblysyndaǵy demalys lagerlerine attanbaq. Osy oraıda balalardy qorǵaý kúni ótkizilgen sherý respýblıkalyq mańyzǵa ıe bolǵanyn ári oǵan elý myńǵa jýyq jetkinshek qatysqanyn aıtqan jón. Balalar sherýiniń asa aýqymdylyǵyn osydan-aq baıqaýǵa bolatyndaı.
Sonymen birge oblys ortalyǵynda «baqytty bala» jobasy aıasynda balalar men jasóspirimderdiń festıval-baıqaýy da márege jetti. Mundaǵy basty maqsat balalardyń óneri men shyǵarmashylyǵyn damytý jáne daryndy balalardy irikteý desek, osy maqsat tolyǵymen oryndalǵany aıqyn. Mundaǵy irikteý kezeńderine 3500 bala qatysyp, ónerlerin ortaǵa saldy. Úzdikter osylaısha úkilenip, olardyń bárine tıisti marapattar men syı-sııapattar tapsyryldy.
Sondaı-aq Aqtóbe qalasynda búgingi qazaq án óneriniń jarqyn ókili Dımash Qudaıbergenovtiń qatysýymen «Baqytty bala» halyqaralyq baıqaýy ótkizildi. Atalǵan vokaldy festıval konkýrsy talantty balalardyń tusaýynkesýmen birge memleketter arasyndaǵy mádenı baılanystardy nyǵaıtýǵa da septigin tıgizgeni haq.
– Bul baıqaýǵa balalardyń ónerin baǵalaýǵa kelgen edik. Olardyń arasynda júrip, ózimniń bala kezim esime tústi. Anam meni túrli baıqaýlarǵa jetelep júrdi. Ekeýmiz poıyzda ómir súrdik desek te bolady. Mundaı aýqymy joǵary baıqaýlar asa qajet. Sebebi qazir talantty balalar óte kóp. Olardyń baǵyn baılamaı jaryqqa shyǵarý kerek, – deıdi qazylar alqasynyń múshesi, «Álemniń úzdik otyz daýysy» tizimine engen ánshi Vladıslav Sytnık.
Aqtóbedegi baıqaýǵa AQSh, Fransııa, Germanııa. Jańa Zelandııa, Polsha, Fınlandııa, Qytaı, Japonııa, Malaızııa, Reseı, Ýkraına memleketteri sekildi álemniń túpkir-túpkirinen kelgen Dımashtyń fanattary Dımash qazaq týrıziminiń elshisi, ol el men eldi, mádenıet pen mádenıetti jalǵastyryp júrgen jas adam. Sirá mundaı adamdar myń jylda bir týatyn shyǵar dep málimdedi.
63 jastaǵy Raı Ýord atty keıýana Dımashpen kezdesý úshin sonaý Jańa Zelandııadan arnaıy kelipti. Baıqaýǵa álem elderinen 400-den astam usynys túsken eken. Onyń tek jıyrmasy ǵana tańdalyp alynǵan. Solardyń biri – Ýkraınanyń Kıev qalasynan kelgen Lıýbov Gretenko. 11 jastaǵy ánshi buǵan deıin de túrli baıqaýlarǵa qatysyp, júldeli oryndardy ıemdenipti.
– Halyqaralyq deńgeıdegi baıqaýǵa birinshi ret qatysyp otyrmyn. Irikteýden ótkenimdi estip qatty qýandym. Danelııa Týleshova men Dımashtyń oryndaýyndaǵy ánderdi súıip tyńdadym. Ekeýimen de kezdeskenime óte qýanyshtymyn, – deıdi ol.
...Mine, osylaısha Aqtóbede jyl basynda qanat qaqqan «Baqytty bala» jobasy sheshýshi kezeńge aıaq basyp keledi.
Temir QUSAIYN,
«Egemen Qazaqstan»
AQTО́BE
