Musylmanǵa, jalpy adam balasyna asa qajet dúnıe – sabyr. Iаǵnı sabyrly bolý. Sózimizge dálel retinde myna bir oqıǵany baıandap bersek: úlken sahaba Ábý Talqanyń jalǵyz balasy syrqattanyp, ákesi túzde júrgende qaıtys bolady. Onyń áıeli Úmma Súleım ólgen balasyn jýyndyryp, kebindep, oń jaqqa jatqyzyp qoıady. Kúıeýi úıine kelip, áıelinen syrqat balasynyń ahýalyn suraıdy. Áıeli: «tynysh, demalyp jatyr» deıdi, kúıeýin jabyrqatqysy kelmeı sabyr saqtap. Ábý Talqa tańerteń erte turyp, namazǵa barýǵa yńǵaılanǵan tusta áıeli balasynyń dúnıeden ótkenin estirtedi. Osy áıeldiń sabyrynyń óteýine Alla olarǵa taǵy toǵyz ul beredi. Osy toǵyz uldyń bári quran-qarı atanady.
Joǵarydaǵy oqıǵany tápsirlegen ımam Hafız bylaı depti: «Úmma Súleım kúıeýine ulynyń qaıtys bolǵanyn aıtyp, jylamaı, balasyn jýyndyryp kebindep, bolǵan jaıdy oǵan tańerteń aıtty. Ony mundaı áreketke jetelegen – sabyrlylyǵy men Allanyń isine moıynsynýy jáne joǵaltqanynyń ornyn toltyryp beredi degen úmiti. Eger ol kúıeýine bolǵan jaıdy sol sátte aıtyp, sabyrsyzdyq tanytsa qalaǵan maqsatyna jete almas edi. Alla taǵala múmkin áıeldiń shyn nıetin bilip muratyna jetkizdi».
Demek sabyrdyń paıda berýi: dál qıyndyqqa tap bolǵan sátte oǵan sabyrlylyq tanytý eken. Qıyndyq basylǵan soń tanytqan sabyrlyq, amalsyz kóný nemese eriksiz boıusynýǵa jatady. Onyń saýaby az.
Beken QAIRATULY,
«Egemen Qazaqstan»
