Biz ǵana emes, bizden burynǵylar da búrkitshilerdiń tirligin áýes kórip, qyzyǵyp qaraıdy eken. Sebebi, ol jaı ǵana ańshylyq emes, ata-babadan qalǵan óner ǵoı.
Al saıatshylyq degenińiz, tabıǵat pen adam arasyndaǵy túısikpen sezip, júrekpen uǵatyn dostyq sapary. Sondyqtan da uly Abaıdyń: «Qansonarda búrkitshi shyǵady ańǵa» dep bastalatyn áıgili óleńindegi tańǵajaıyp sýret kóńilińizdi ǵana emes, qanyńyzdy da tolqytyp, tebirentip, shymyrlata jóneledi.
Ol turmaq, jaıshylyqta kezdese qalǵan búrkitshiniń de áńgimesin kópke deıin umyta almaı, tap bir ózińiz saıatshylyq quryp qaıtqandaı sergip, aınalańyzdaǵy jurtqa aıtqyńyz kelip, tilińiz qyshyp-aq turady.
Mine bul da sondaı qyzyq áńgimelerdiń biri edi. Al tyńdaıyq, jamaǵat.
– Jasy toqsanǵa kelse de attan túspeı, saıatshylyq qurǵan Mashan Ýálıuly degen atamyz boldy, – dep bastady búrkitshi áńgimesin.
Birde inisi Zeınýlla ekeýi taýǵa, túlki aýlaýǵa barypty. Mashan atamyz dabyl qaǵyp, aıqaılap túz taǵylaryn úrkitetin kórinedi. Zeınýlla bolsa qolyna búrkitin ustap, aınalany bıikten sholyp turypty.
Bir kezde qyran tómen qaraı shúıile jóneledi. Aǵyp baryp, áp-sátte appaq qardyń betimen zymyrap bara jatqan qyzyl túlkini umar-jumar etip, sheńgeline alyp, qona ketedi. Artynsha astyndaǵy atyn ekpindetip Mashan qarııa da jaqyndap qalǵan eken. Kele sala erden qarǵyp túsip, so boıy qalshıyp tura qalady.
Qyr jaqtan shaýyp kele jatqan Zeınýlla aıǵaılap: «Oý, umtylsańyzshy! Umtylsańyzshy! Túlki búrkittiń aıaǵyn shaınap tastaıtyn boldy ǵoı», dep janushyrady.
Biraq ánsheıinde túlkini soıylmen bir soǵyp, qyrandy ajyratyp ala qoıatyn qarııa bul joly selt etpeıdi. Tikesinen tik turǵan qalpy qozǵalmaıdy.
Sodan ne kerek, Zekeń qyrandy ózi ajyratyp alǵan soń Mashekeńniń janyna keledi. Sóıtse, attan qarǵyp túse beremin degende qarııanyń shalbarynyń aýy erdiń basyna ilinip qalyp, ne isterin bilmeı salbyrap turǵan kezi eken ǵoı!..
Búrkitshi áńgimesin aıaqtap, bizge qarap jymıyp otyr. Biz de basymyzdy shaıqap, ezý artqan bolamyz. Biraq ishteı: «Alla jarylqap, toqsan jas bere qalsa, atqa minip, túlki aýlamaq túgili, esik aldyna shyǵýdyń ózi muń bolyp qala ma!» degen bir oı mazalaıdy.
Nurǵalı ORAZ,
«Egemen Qazaqstan»
