«Nur Otan» partııasynyń qyzmetin jańǵyrtý aıasynda jańa 22 joba qolǵa alynǵan bolatyn. Olardyń qatarynda «Sıfrly Qazaqstan», «Rýhanı jańǵyrý» baǵdarlamalaryn júzege asyrý men shaǵyn jáne orta bıznesti qoldaýǵa baǵyttalǵan tyń bastamalar bar.
Elbasy 1 maýsymda ótken partııa Saıası keńesiniń keńeıtilgen otyrysynda partııanyń bul jańa bastamalaryna qoldaý bildirip, olardy tabysty oryndaý úshin naqty tapsyrmalar berdi. Soǵan oraı búginde nurotandyqtar atalǵan partııalyq jobalardy iske asyrý maqsatynda júıeli jumystar júrgizýde.
«Rýhanı jańǵyrý» baǵdarlamasy aıasynda partııa tarapynan qolǵa alynǵan jańa jobalardyń biri – otandyq kitaphanalardy jańǵyrtyp, olardy qazirgi zamanǵy bilim ortalyqtaryna aınaldyrý. Sol arqyly kitaphanalardy jaıly demalys oryndary retinde qaıta quryp, ol jerlerde jastarǵan arnalǵan qyzyqty leksııalar men ózekti taqyryptardy talqylaıtyn pikirtalastardy turaqty ótkizip turý kózdelgen. Odan bólek, joba aıasynda biryńǵaı onlaın kitaphana júıesi qalyptasyp, elimizdegi barlyq kitap qory elektrondy nusqaǵa kóshirilmek. Bul júıege elimizdegi mektep pen ýnıversıtet kitaphanalary da qosylady. Osylaısha qazaqstandyq kitaphanalar zamanaýı baǵytta qyzmet kórsetip, halyqtyń mańyzdy, suranysqa ıe kez kelgen ádebıetti oqýyna jol ashylatyn bolady.
«Nur Otan» partııasy Tóraǵasynyń birinshi orynbasary qazirgi zamanǵy bilim ortalyǵy retinde qaıta jańǵyrǵan Jambyl atyndaǵy kitaphananyń jumysyna aıryqsha mán berip, mundaı utymdy tájirıbeni elimizdiń basqa qalalarynda da júzege asyrý kerektigin atap ótti. О́ıtkeni Elbasynyń «Rýhanı jańǵyrý» baǵdarlamasynyń negizgi baǵyttarynyń biri – halyqtyń bilimge degen qushtarlyǵyn odan ári arttyrý.
Sondaı-aq partııa Tóraǵasynyń birinshi orynbasary atalǵan partııalyq joba shalǵaıdaǵy aýyldyq kitaphanalar úshin asa mańyzdy ekenine nazar aýdardy.
– Bul joba boıynsha biryńǵaı onlaın kitaphanalar júıesi iske qosylmaq. Sonyń aıasynda elimizdegi barlyq kitap qorynyń sıfrly nusqalary daıyndalady. Qazirdiń ózinde bul jumystar ár óńirde júrgizilýde. Biz osy bastamany bir izge túsirip, negizgi sıflandyrý jumystaryn elimizdegi iri kitaphanalarda júrgizýdi kózdep otyrmyz. Al óńirlik kitaphanalar atalǵan oqýlyqtardy sol ortalyqtardan alyp, ózderi ólketanýǵa qatysty, óńir úshin mańyzdy kitaptardy sıfrlandyratyn bolady. Bul qaıtalaýlardyń, artyq shyǵyn men jumys kúshiniń aldyn alýǵa mol septigin tıgizedi, – degen Máýlen Áshimbaev osyndaı ıgi isti sátti júzege asyrýda Jambyl atyndaǵy kitaphananyń tájirıbesin ózge óńirlerge qoldaný kerektigin tilge tıek etti.
Shyn máninde Jambyl atyndaǵy kitaphananyń qaıta jańǵyrtylýy óte joǵary deńgeıde júrgizilgen. Iаǵnı rýhanııat ordasy sońǵy úlgide jabdyqtalyp, búginde eýropalyq kovorkıng ortalyqtarynyń deńgeıinde qyzmet kórsetýde. Munda jeke jumys isteý úshin birneshe tynysh aımaq jáne jańa jobalardy top bolyp talqylaýǵa arnalǵan tıisti oryndar qarastyrylǵan. Bilim ortalyǵy qajetti kompıýterlermen jáne jyldamdyǵy joǵary Wi-Fi ınternet jelisimen de jabdyqtalǵan. Osy rette partııanyń osy baǵyttaǵy tyń bastamasynyń nátıjesinde búginde elimizdiń alty birdeı óńirinde kitaphanalardyń jumysy atalǵan formatqa kóshirilip jatqanyn atap ótken jón.
Sonymen qatar Máýlen Áshimbaev Almatyǵa sapary kezinde «Mıloserdıe» erikti qoǵamy» qoǵamdyq qory Qamqorshylar keńesiniń múshesi retinde atalǵan Keńestiń otyrysyna qatysty. Bul qor 2006 jyldan beri jumys istep keledi. Belsendi qoǵam qaıratkeri Arýjan Saın basqaratyn uıym sodan beri balalardyń densaýlyǵyn jaqsartý jolynda úsh negizgi joba boıynsha aýqymdy jumystar atqardy. Atap aıtqanda:
– «Balalarǵa ómir syıla» jobasy boıynsha elimizdegi emdelmeıtin dertke shaldyqqan balalarǵa kómek kórsetiledi (búginge deıin 1613 balaǵa kómek kórsetilgen);
– «Jetimdersiz Qazaqstan» jobasy boıynsha bala asyrap alýshylarǵa zańdyq keńester berilip, jetim jáne ata-ana qamqorlyǵynsyz qalǵan balalardy qazaqstandyq otbasylarǵa ornalastyrý baǵytynda jumystar júrgizildi (joba qolǵa alynǵaly beri balalar úılerindegi bala sany 3,5 esege azaıǵan);
– «Aýtızmdi jeńemiz» jobasy boıynsha balalary aýtızm dertine shaldyqqan otbasylarǵa naqty kómek kórsetilip keledi (joba aıasynda búginge deıin 500-den astam osyndaı qazaqstandyq otbasyna kómek kórsetilgen).
Qamqorshylar keńesiniń otyrysynda «Nur Otan» partııasy Tóraǵasynyń birinshi orynbasary Qordyń jumysy elimizdiń jarqyn bolashaǵy úshin asa mańyzdy ekenin aıtty.
– Qordyń arqasynda elimizdegi myńdaǵan bala men ata-ana, týǵan-týys úlken qýanyshqa bólengenin kórip otyrmyz. Balanyń densaýlyǵynan artyq, odan mańyzdy eshnárse joq. Sondyqtan osy jolda ter tógip júrgen barsha jandardyń jumysyna tek sáttilik tileımin. Aldaǵy ýaqytta partııa tarapynan Qordyń jumysyna qatysty máselelerdiń oń sheshilýine tıisti qoldaý kórsetilip, qajetti sharalar qolǵa alynady. О́ıtkeni múmkindigi shekteýli jandarǵa jan-jaqty qoldaý kórsetý partııa basymdyqtarynyń biri, – dedi Máýlen Áshimbaev.
Saparbaı PARMANQUL,
«Egemen Qazaqstan»
ALMATY
