Bul – Reseı men Shyǵys Eýropa tórindegi jáne Qazaqstanǵa eń jaqyn jerde ótetin tuńǵysh jahan birinshiligi. Álemdik dop dodasyndaǵy kezdesýler 14 maýsym men 15 shilde aralyǵynda Reseıdiń 11 qalasyndaǵy 12 stadıonda ótedi. Chempıonattyń shymyldyǵy Reseı men Saýd Arabııasy arasyndaǵy matchpen ashylady.
Reseı Federasııasy 2009 jyly Halyqaralyq fýtbol federasııasyna (FIFA) 2018 jylǵy álem chempıonatyn ótkizýge ótinish berip, 2010 jyldyń 2 jeltoqsanynda Sıýrıhte uıymdastyrý komıteti daýys berý nátıjesi boıynsha jeńiske jetti. Daýys berýdiń eki kezeńi boıynsha Reseı Federasııasy jeńimpaz dep tanylyp, 2018 jylǵy álem chempıonatyn ótkizý quqyǵyna ıe boldy.
Bıylǵy dop dodasyn uıymdastyrý úshin Reseı 480 mlrd rýbl jumsaǵan. Bul týraly jyl basynda «Reseı – 2018» uıymdastyrý komıtetiniń ókili Alekseı Sorokın málimdedi. Qarjynyń biraz bóligi tórt stadıondy qaıta jóndeýden ótkizýge jáne bes jańa stadıon salýǵa jumsalǵan. 2014 jylǵy álem chempıonatyn uıymdastyrýǵa Brazılııa úkimeti 11,63 mlrd dollar jumsaǵan-dy.
2018 jylǵy álem chempıonatynyń resmı logotıpi 2014 jyly tanystyryldy. Onyń tanystyrý rásimine FIFA-nyń sol kezdegi prezıdenti Iozef Blatter, Reseı Federasııasynyń sport mınıstri Vıtalıı Mýtko jáne 2006 jylǵy álemniń úzdik fýtbolshysy ıtalııalyq Fabıo Kannavaro qatysty. Al birinshiliktiń talısmany retinde Zabıvaka atty qońyr túkti jáne kógildir kózdi antropomorfty qasqyr tańdalǵan. Zabıvakanyń kıimindegi aq, kók jáne qyzyl túster Reseı týynyń túsin beıneleıdi. Chempıonattyń ánuranyn ashylý saltanatynda amerıkalyq akter, hıp-hop oryndaýshy Ýıll Smıt pen Nıkı Djem jáne albanııalyq Era Istrefı shyrqaıdy.
Chempıonattyń ashylý saltanaty búgin Máskeýdegi «Lýjnıkı» stadıonynda ótedi. Oǵan FIFA prezıdenti Djannı Infantıno, Reseı prezıdenti Vladımır Pýtın men birneshe memlekettiń basshylary qatysady. Olardyń ishinde Qazaqstan Prezıdenti Nursultan Nazarbaev ta bar. Elbasyn V.Pýtınniń ózi arnaıy shaqyrǵan bolatyn.
Jahandyq jarys bastalmas buryn mamandar men jankúıerler bıylǵy chempıonatta kim top jaratynyna ózderinshe boljam jasap otyr. Sheteldik Goldman Sachs ınvestısııalyq bankiniń saýalnamasy boıynsha, bıyl Brazılııa quramasy álemniń alty dúrkin chempıony atanýy múmkin. Ekinshi orynda Fransııa bolsa, úzdik úshtikti Germanııa quramasy qorytyndylap tur. Al ınvestısııalyq banktiń boljaýynsha, jarys qojaıyndary tipti toptan da shyǵa almaýy yqtımal. Alaıda munyń barlyǵy tek boljam ekeni belgili. Jaǵdaıdyń qalaı órbıtinin aldaǵy oıyndar kórsetedi.
Aıta keteıik, sanaýly saǵattardan soń bastalatyn álem chempıonatyn elimiz boıynsha kórsetý quqyǵyn «Qazaqstan» RTRK» ılengen. Qazaqstandyq fýtbol jankúıerleri Reseı jerinde ótetin fýtbol toıyn bir aı boıy «Qazaqstan» jáne «Qazsport» telearnalarynan tamashalaı alady. Sonymen qosh keldiń fýtbol toıy!
Álı BITО́RE,
«Egemen Qazaqstan»
