«Workshop Time» ınnovasııalyq formadaǵy tálimgerlik taqyrybyna qyzyǵýshylyq tanytatyn adamdardy biriktiretin tanymdyq ǵylymı-pedagogıkalyq qaýymdastyq bolyp esepteledi. Onyń basty maqsaty – ulaǵatty ustazdardyń is-tájirıbelerin jastarǵa tanystyrý, taratý, tabysqa jetý syrlaryn ortaǵa salý. О́ńirimizde alǵash ret ótkizilgen sharaǵa elimizdiń ár qıyrynan 200-den astam muǵalim kelip, zamanaýı bilim berýdiń biregeı modelderi men tálimgerlik túrlerin talqylaý erkin áńgime, ashyq dıalog túrinde órbidi.
Alqaly basqosýdy «О́rleý» biliktilikti arttyrý ulttyq ortalyǵy» AQ-tyń tóraǵasy, Ulttyq ǵylym akademııasynyń korrespondent-múshesi, pedagogıka ǵylymdarynyń doktory Gúlnaz Ahmetova kirispe sózben ashyp, qyzmetke jańadan ornalasqan muǵalimdi ortaǵa beıimdeý, sheberligin shyńdaý, jan-jaqty qoldaý kórsetý máseleleri aıasynda atqarylǵan jumystarmen qatar qordalanǵan problemalarǵa da toqtaldy. Pedagogter bes jylda bir ret kásibı biliktiligin arttyrý kýrstarynan ótedi. Menińshe, bul jetkiliksiz. Olarǵa qoıylatyn mindetterdiń aýqymdylyǵyn, ýaqyttyń kúrdeliligin eskere otyryp, merzim aralyǵyn qysqartqan durys. Oǵan tehnıkalyq ta, materıaldyq ta múmkindikter tolyq jetedi. Búginde tálimgerlik semınar-baıqaýlardyń 51 paıyzdaıy mektepterde ótkizilip júr. Munyń jas muǵalimder úshin kómegi óte zor», dedi ol. Sondaı-aq oqý ornyn bitirip kelgen mamandar arasynda turaqtamaı otyrǵanyn atap ótti. 2016-2017 oqý jylynda elimizdiń bilim oshaqtarynda úsh jylǵa deıin eńbek ótili bar 34 myńnan astam muǵalim eńbek etse, búginde besten biri basqa qyzmetterge aýysqan.
Basty sebebi – tolyqqandy kómekterdiń kórsetilmeıtini, áleýmettik jaǵdaılardyń jasalmaıtyny. Bilikti ustazdardyń, mektep basshylyǵynyń tálimgerlik qozǵalysty jandandyrýdyń ornyna kejegesi keıin tartatyn jaıttar da kezigedi. Shetelderde tálimgerlik dástúri keńinen qanat jaıǵan. Arnaıy baǵdarlamalar jumys isteıdi. Yntaly, talapty jastardyń óz mamandyǵyna degen maqtanysh sezimin, jaýapkershiligin arttyramyz desek, osy úrdisti keńinen engizgen jón. Máselen, Eýropanyń birqatar memleketinde jas ustazdardy óz isine baýlyp, joǵary kásibı maman retinde daıyndap shyqqan tálimgerlerdiń jalaqysy kóbeıtilip, saǵattary qysqartylady. Osy oraıda Syr óńirinde qalyptasqan oń úrdister quptarlyq. Qyzylorda oblystyq «О́rleý» pedagog qyzmetkerleriniń biliktiligin arttyrý ınstıtýtynyń dırektory Baýyrjan Eleýsinovtiń aıtýynsha, 25 myńǵa jýyq muǵalimniń 60 paıyzdaıy jastar. Árqaısysyna tájirıbeli ustazdar bekitilip berilgen.
Durys nusqaý berip, jol kórsetýdiń arqasynda kadr turaqtamaýshylyǵy azaıyp, kerisinshe óz isine yntaly jastar qatarynyń artqany baıqalady. Al Petropavl qalasyndaǵy Ǵ. Músirepov atyndaǵy № 43 mekteptiń qazaq tili jáne ádebıeti pánderiniń muǵalimi Aıjan Ibraeva «Rýhanı jańǵyrý» baǵdarlamasy negizinde ázirlegen tálimgerlikpen aınalysý jobasymen tanystyrdy. 34 saǵatty quraıtyn baǵdarlamada muǵalimder men oqýshylardyń qarym-qatynasy, jas urpaq tárbıesi, óńir tarıhy, kıeli jerler keńinen qamtylǵan. Aldaǵy ýaqytta tálimgerlik etý úlgisin tolyqtyryp, basqa mektepterge usynbaq.
«Pedagogıkalyq áýlet – kásibı damý mektebi» plenarlyq otyrysynda Qajytaı Moldabaevtyń ómir joly úlgi-ónege retinde usynyldy. Ardager ustaz sanaly ǵumyrynyń 44 jylyn bala tárbıesine arnapty. Áýletimen túgel muǵalimdik mamandyqty tańdapty. Báriniń jumys ótilin qosqanda 400 jylǵa jýyqtaıdy. Tálimgerliktiń ómirsheń ádistemesi retinde «OrleuOnlineResourses» jobasy tanystyrylymynda aqparattyq ozyq tehnologııalar, kásibı tabysqa jetý joldary, ǵylymı jańashyldyqtar, mektepten biliktilikti arttyrý júıesine deıingi ózara árekettestik máseleleri taqyryp arqaýyna aınaldy.
Qorǵan áleýmettik tehnologııalar jáne bilim berý salasyn damytý ınstıtýtynyń prorektory, pedagogıka ǵylymdarynyń kandıdaty Aleksandr Shatnıh, oblystyq bilim basqarmasy basshysynyń orynbasary Kúlpash Qalǵojına, Soltústik Qazaqstan pedagog qyzmetkerleriniń biliktiligin arttyrý mekemesiniń jetekshisi Alma Myrzalınova, Kókshetaý ýnıversıtetiniń professory Sabyr Seńkibaev, taǵy basqalar barlyq deńgeıdegi bilim berý uıymdarynda, pedagogter arasynda tálimgerlikti uıymdastyrýdyń, kásibı baıqaýlardyń sapasyn arttyrýmen, mazmunyn jetildirýdiń tolǵaqty jaıttaryn áńgimeledi.
О́mir ESQALI,
«Egemen Qazaqstan»
Soltústik Qazaqstan oblysy
