ÁCh: Serbter senim artqan serkeler

Serbııa quramasynyń joǵary deńgeıde dop teýip, azýlylarmen aıqasyp-aq júretin jóni bar. Álemniń alpaýyt komandalarynda oınap júrgen serbııalyqtar jetkilikti. Alaıda sońǵy 10 jyldyqta bul qurama kóptegen ózgeristerdi bas­tan ótkerdi. Sonyń saldarynan turaqtylyqtan aıyrylǵan. Mysaly, basynda bul komanda Iýgoslavııa dep atalǵanyn bilesizder. 2003 jyly qurama Serbııa jáne Chernogorııa dep atala bastady. Sosyn 2006 jyly Chernogorııa bólinip ketti de, jalǵyz Serbııa qaldy. Bul aralyqta quramanyń negizgi oıynshylary Chernogorııaǵa aýysty da, komanda qaıta jasaqtaldy. Osyndaı alma­ǵaıyp kezeńder kóp oryn alǵan soń, Serbııa birde Eýropa birinshiligine, birde álem birinshiligine shyǵa almaı júrdi. Endi mine, Serbııa derbes komanda bolyp birinshi ret birinshilikke qatysqaly tur.

Irikteý kompanııasyn Serbııa sátti bastady. Ne­gizgi básekeles Aýstrııa, Irlandııa, Ýelsten kerekti upaıdyń bárin aldy. 10 oıynnyń 6-yn jeńip, 3-inde teń tústi. Bir ǵana matchta jeńilis tapty. Biraq sol jeńilis serbterge óte aýyr tıdi. 9-týrda Aýstrııaǵa qonaqqa barǵan balqandyqtar 89-mınýtta gol jiberip alyp, qorjyndary bos qaı­t­ty. Osy aralyqta Ir­lan­dııa qarsylastaryn je­ńip, upaıdan shashaý shyǵar­mady. Sońǵy týrda Serbııa Grýzııamen kez­desip, Belgradtaǵy oıynda 3 upaıdy match sońyna qaraı julyp áketti. Áıt­pegende, álem chempıonatyna Irlandııa shyǵar edi. Aleksandr Prııovıchtiń jalǵyz goly búkil Belgra­d­taǵy jankúıerlerdi baqytqa bóledi.

Quramanyń oıynshylar tizimine qarasańyz, Ser­bııa chempıonatynda oınaıtyn 3 qana fýtbolshyny kóresiz. Olar: qaqpashy Stoıkovıch, qorǵaýshy Mılan Rodıch, jar­tylaı qorǵaýshy Ne­manıa Radonıch. Qalǵan fýt­bolshylar túgelimen shet­el chempıonattarynda oı­naıdy. Jáne jaı shetel emes, kileń Anglııa, Ispanııa, Germanııa, Italııa sekildi álemniń eń aıtýly birinshilikteri. Komandanyń qorǵanysyn qaıdam, jartylaı qorǵaýshylary «ki­leń sen tur, men ataıyn» degen­der. Komandanyń bas­ty juldyzy «Manchester Iýnaıted» oıynshysy – Ne­manıa Matıch. Ol qazirgi tańda ortalyq jartylaı qor­ǵanysty tasqamal ustaı­tyn eń tańdaýly oryndaýshy desek artyq emes.

Serbııa quramasynyń tizimi:

• qaqpashy: Vladımır Stoı­­kovıch (Partızan), Mar­ko Dmıtrovıch (Eıbar, Is­panııa), Predrag Raıkovıch (Mak­kabı Tel-Avıv, Iz­raıl);

• qorǵaýshy: Aleksandar Kolarov (Roma, Italııa), Bra­­nıslav Ivanovıch (Ze­nıt, Reseı), Dýshko To­shıch (Gýanch­joý Fýlı, Qy­taı), An­tonıo Rýkavına (Vılıar­real, Ispanııa), Mı­losh Vel­kovıch (Verder, Ger­­manııa), Mılan Rodıch (Sr­vena Zvezda), Ýrosh Spaıch (Kras­­nodar, Reseı), Nıkola Mılenkovıch (Fıorentına, Italııa);

• jartylaı qorǵaý­shylar: Nemanıa Matıch (Man­chester Iýnaıted, An­glııa), Sergeı Mılın­kovıch-Savıch (Lasıo, Ita­lııa), Lý­ka Mılıvoevıch (Krıstal Pelas, Anglııa), Adem Lıaıch (Torıno, Italııa), Marko Grýııch (Lıverpýl, Anglııa), Nemanıa Radonıch (Srvena Zvezda), Dýshan Tadıch (Saýt­gempton, An­glııa), Fı­lıp Kostıch (Gam­býrg, Germanııa), An­drııa Jıvkovıch (Benfıka, Portýgalııa);

• shabýylshylar: Aleksandar Mıtrovıch (Fýl­hem, Anglııa), Alek­sandar Prııovıch (PAOK, Grekııa), Lýka Iovıch (Aıntraht, Ger­manııa).

• Bas bapker: Mladen Krstajıch – 43 jasta (04.03.74).

Ermuhamed MÁÝLEN,

«Egemen Qazaqstan»