Sharany Keńes tóraǵasy, Parlament Senaty Tóraǵasynyń orynbasary Sergeı Gromov ashty. Ol óz sózinde Memleket basshysynyń áleýmettik bastamasy halyqtyń az qorǵalǵan toptarynyń ózekti máselelerin sheshýge arnalǵanyn atap ótti.
«Prezıdent sózi negizinen qarapaıym jandarǵa arnalyp otyr. Bul salmaqty ári aýqymdy baǵdarlama, bes bastamanyń árqaısysy birneshe mıllıondaǵan adamdardyń múddelerin qorǵaýǵa arnalǵan. Bárin qosqanda keminde turǵyndardyń jartysy Prezıdenttiń áleýmettik baǵdarlama aıasynda qamtylady», - dedi Senat Tóraǵasynyń orynbasary.
Onyń sózinde Qazaqstan qazirdiń ózinde tómen mólsherdegi salyq salatyn memleket ekeni atalyp ótildi. Sonymen birge, S. Gromovtyń aıtýynsha, eńbekaqysy tómen adamdarǵa salyq aýyrtpalyǵyn 1 paıyzǵa deıin 10 ese azaıtý – bul memleket tarapynan jasalyp otyrǵan aýqymdy shara, onyń aıasynda 2 mıllıonnan astam adam qamtylady.
Ekinshi bastamany iske asyrý jónindegi memlekettik organdardyń jumysy týraly ulttyq ekonomıka mınıstriniń birinshi orynbasary Rýslan Dálenov baıandady. Ol tıisti memlekettik organdar «Atameken» Ulttyq kásipkerler palatasymen birlese otyryp, eńbekqysy tómen jumysshylarǵa salyq salýdyń ońtaıly tetikterin aıqyndaǵany týraly habardar etti. Zańnamaǵa tıisti túzetýler ázirlenip, «Qazaqstan Respýblıkasynyń keıbir zańnamalyq aktilerine áleýmettik qamsyzdandyrý máseleleri boıynsha ózgerister men tolyqtyrýlar engizý týraly» zań jobasyna engizildi.
Eńbek jáne halyqty áleýmettik qorǵaý mınıstriniń orynbasary Svetlana Jaqypova depýtattarǵa eńbekaqysy tómen adamdar týraly statıstıkalyq derekterdi tanystyrdy. Onyń málimetteri boıynsha, mindetti zeınetaqy jarnalaryn tóleıtin 5,8 mıllıon adamnyń aıyna ortasha kirisi 60 myń teńge, 2,2 mıllıon adam odan da tómen alady. Mınıstr orynbasarynyń aıtýynsha, aýyl sharýashylyǵy, bilim berý, densaýlyq saqtaý, áleýmettik qorǵaý, kóterme jáne bólshek saýda sekildi salalardaǵy jaldamaly qyzmetkerlerdiń úlesi joǵary bolyp otyr.
Talqylaýǵa Senat jáne jergilikti máslıhat depýtattary, múddeli mekemelerdiń ókilderi qatysty.
