«Qurmetti «Atameken» UKP V seziniń qatysýshylary, hanymdar men myrzalar!
QR «Atameken» ulttyq kásipkerler palatasynyń V seziniń ashylýymen barshańyzdy shyn júrekten quttyqtaımyn.
Bıyl «Atameken» ulttyq kásipkerler palatasynyń qurylǵanyna bes jyl tolady. Osy ýaqyt ishinde Palata ózin bıznes qaýymdastyǵynyń quqyqtaryn qorǵaý jónindegi táýelsiz ınstıtýt retinde aıqyndady. Ulttyq palata memlekettik organdar men kásipkerler arasynda tıimdi yntymaqtastyq ornatýǵa arnalǵan baılanystyrýshy býyn retinde jumys istedi. Ulttyq palata elimizdiń turaqty damýyna úlken úles qosatynyna senimdimin.
Qurmetti hanymdar men myrzalar!
Kásipkerlik — ekonomıkanyń naqty lokomotıvi jáne qozǵaýshy kúshi. Qazaqstan úshin iskerlik belsendiliktiń damýy óte mańyzdy. Biz atalǵan baǵytta birlesip úlken tabystarǵa qol jetkizemiz.
Qazaqstan Dúnıejúzilik banktiń «Doing Business» reıtıngisinde sońǵy 10 jylda 64-ten 36-orynǵa deıin kóterildi. Elimizde makroekonomıkalyq turaqtylyq qamtamasyz etilip, bıznes ahýal jaqsara túsýde. JIО́ ósimi 4% quraıdy, bul álemdik ortasha kórsetkishten joǵary.
Qurylymdyq jáne ulttyq reformalar júzege asyrylýda, ınvestısııalyq ahýaldy jaqsartý boıynsha júıeli jumystar júrgizilýde, jańa Salyq jáne Kedendik kodekster kúshine endi, kásipkerlikti retteý máseleleri boıynsha zańnamalyq túzetýler paketi qabyldandy. Onda bıznes qaýymdastyqtyń usynystary barynsha eskerilgen. Atalǵan jumys jalǵasady jáne keńeıtiledi. Otandyq bıznesmender, «Atameken» UKP osy mańyzdy proseske belsene qatysýy tıis.
Bizdiń strategııalyq maqsatymyz — Qazaqstannyń ozyq damyǵan 30 eldiń qataryna qosylýy. Bul úshin elimizdiń JIО́-de ShOB úlesin 50%-ke deıin ulǵaıtý qajet. Sonymen qatar, Tórtinshi ónerkásiptik revolıýsııa jaǵdaıynda biz ekonomıkany jedel jańǵyrtýǵa, jańa tehnologııalar men ınnovasııalardy engizýge bet aldyq. Áleýmettik bastamalar aıasynda shaǵyn nesıe berý ulǵaıtylýda, «Bastaý» jobasy sekildi mańyzdy is-sharalar júzege asyrylyp jatyr. Tek osy jyly kásipkerlik negizderine 160 aýyldyq aýdandar men 40 shaǵyn qalany qamtı otyryp, 30 myń aýyl turǵynyn oqytý kózdelgen. Barlyq alǵa qoıylǵan maqsattar men mindetterdi júzege asyrý úshin Úkimet pen «Atameken» palatasynyń birlesken jáne birizdi jumys atqarýy qajet.
Búginde Ulttyq palata ózin qazaqstandyq bıznes-qaýymdastyqty biriktirýdiń negizi retinde tanytty. Uıym — el damýynyń strategııalyq reformalaryn ilgeriletý mehanızmi sanalady. Bul barlyq otandyq kásipkerlerdi biriktiretin TMD-daǵy jalǵyz qurylym, zań júzinde bekitilgen keń fýnksııalary men ókilettikteri bar.
Bul sezd Palatanyń bes jyldyq jumysynyń qorytyndysyn shyǵarýdyń mańyzdy sharasy bolatynyna senimdimin. Bul qazaqstandyq bıznesti damytýdyń jańa perspektıvalyq baǵyttary men salalaryn anyqtaýǵa jol ashady. Elimiz Qazaqstan Respýblıkasynyń ıgiligi men órkendeýi úshin jemisti eńbek pen jetistikter tileımin», — delingen Memleket basshysynyń joldaǵan hatynda.
Eske sala keteıik, búgin «Atameken» ulttyq kásipkerler palatasynyń V sezi ótip jatyr.
Abaı ASANKELDIULY,
«Egemen Qazaqstan»
