Belgııa dop dodasyna 13-ret qatysyp otyr. Bul qurama o basta dúıim jurtqa «Qyzyl soıqandar» degen laqap atpen tanylǵan eken. Iá, bul ataý jurt biletin «Manchester Iýnaıtedke» emes, dál osy Belgııa ujymyna tıesili bolatyn. Resmı derekterge júginsek ony 1906 jyly Belgııanyń Fransııa men Nıderlandyny jeńip, sensasııa jasaǵanynan keıin jýrnalıst Per Valker oılap taýypty. Onyń ústine komandanyń jeıdesi qyzyl tústi bolǵany da bul ataýǵa muryndyq bolǵan kórinedi.
Belgııa bıylǵy álem chempıonatynyń favorıtteriniń biri ekeni daýsyz. Qurama oıynshylaryna kóz júgirtsek árqaısysy qart qurlyqtyń men degen klýbtarynda óner kórsetedi. Eden Azar, Romelý Lýkaký, Kevın De Brıýıne, Mıshı Batshýaıı, Vensan Kompanı, Tıbo Kýrtýa... Aıta bersek kete beredi. Belgııanyń «altyn býyny» pisip jetilgen shaq.
2014 jylǵy dop dodasynda tájirıbesiniń azdyǵynan Argentına quramasyna ese jibergeni belgili. Sol tustaǵy oıynshylarǵa mán bersek, Eden Azar 23 jasta, Romelý Lýkaký 21-den endi asqan, Kýrtýa 22-de, Batshýaıı tipti álem chempıonatyna shaqyrtý almaǵan. Al bul jolǵy «qyzyl soıqandardyń» jóni múldem bólek. Kemeldengen shaǵyna jetken, árqaısysy «sen tur, men ataıyn» degen jigitter. Negizgi quramdaǵylardyń biri jaraqat alyp qalsa, ornyn joqtatpaıtyn oıynshylar jeterlik. Bilikti oıynshylarynyń kóptigi sondaı, tipti Radja Naınggolan sekildi ortalyq jartylaı qorǵanysta oıqastaıtyn mańyzdy oıynshysyn álem birinshiligine almaı ketti. Osyǵan qarap-aq Roberto Martınes shákirtteriniń áleýetin ańǵarýǵa bolatyndaı.
«Altyn býynnyń» synalar syn saǵaty kelip jetti. «Qyzyl soıqandar» chempıondyq ataqqa basty úmitkerlerdiń biri ekenin joqqa shyǵarý múmkin emes, biraq olarǵa Argentına, Brazılııa, Germanııa ujymdary sekildi úlken qysym kórsetilmeıdi. Qysymnyń azdyǵyn utymdy paıdalanyp, alysqa shabýǵa múmkindik bar. Biraq osyǵan deıingi álem, Eýropa birinshilikterindegideı shırek fınalǵa jetip toqmeıilsýge bolmaıdy. Úzdikterden quralǵan quramaǵa jankúıer tarapy kem degende úzdik úshtikke enýdi mindetteıtini anyq.
«Altyn býyn» demekshi, bir kezderi Anglııa quramasy da nebir talanttarǵa toly edi. Biraq Devıd Bekhem, Maıkl Oýen, Frenk Lempard, Stıven Djerard sekildi marqasqalarǵa toly ujym eshbir dodada jarytyp nátıje kórsete almady. 2002 jyldan bergi álem, Eýropa chempıonattarynda shırek fınaldan asyp árige bara alǵan emes. Belgııa da ázirge dál osy aǵylshyndardyń sátsiz jolymen keledi. 2014 jylǵy álem chempıo-
natynda da, 2016 jylǵy qurlyq dodasynda da shırek fınalda súrindi.
Belgııa toptyq kezeńniń alǵashqy kezdesýin 18 maýsym kúni Panama quramasyna qarsy ótkizip, 3:0 esebimen jeńiske jetti. Matchta Drıs Mertens 47-mınýtta esep ashsa, «Manchester Iýnaıted» shabýylshysy Romelý Lýkaký 69, 75-mınýttarda basymdyqty arttyrdy. Endi toptyq kezeńdegi kelesi matchyn osy aıdyń 23 kúni Týnıske qarsy ótkizedi. Al sońǵy bolyp 29 maýsym kúni aǵylshyndarǵa qarsy kezdesý kútip tur.
Aıan ÁBDÝÁLI,
«Egemen Qazaqstan»
