Mańyzdy sharanyń túıini esebinde «Etnoaýyl» ulttyq mádenı kesheninde uıymdastyrylǵan túrkistandyq óner tarlandarynyń merekelik konserti kópshiliktiń kóńilinen shyqty.
«Shyrqa, sharyqta, Túrkistan» dep Arqany ánmen terbegen qorytyndy konsertke oblysqa esimi tanymal 150-ge jýyq mádenıet jáne óner sheberleri qatysty. Dýmandy kesh qazaqtyń «Qara jorǵa» bıimen bastalyp, Túrkistan týmasy áıgili kompozıtor Sh.Qaldaıaqovtyń jáne aımaqqa aty málim E.Serikbaev, Á.Botaǵaraev syndy tanymal sazgerler qalamynan týǵan patrıottyq, lırıkalyq ánder shyrqaldy.
Sonymen qatar óńir mádenıetine ózindik úlesin qosyp júrgen óner maıtalmandary elimizge eńbek sińirgen ártis Sábırash Abdraıymova, halyqaralyq, respýblıkalyq baıqaýlardyń laýreaty Álden Jaqsybekov, dástúrli ánshi Aqmaral Bınazarova jáne «Qazyna» bı toby men «Tumar» folklorlyq ansambli qatysyp, bas qala turǵyndaryn án-jyrmen sýsyndatty. Bulardan basqa kóne turandyq baıyrǵy saryndy jańǵyrtyp júrgen «Saryn», «Retro» toptary da kórermen yqylasyna bólendi.
Oblystyq mádenı mekemelerine jaýapty baspasóz ókili Mádına Áıtpenbetovanyń aldyn ala tanystyrǵan málimetine júginsek, dál qazir oblys kólemindegi 736 mádenıet jáne óner mekemesinde 5 myńǵa jýyq adam abyroıly eńbek etip júr. Sonymen qatar óńirdiń rýhanı-mádenı ahýaly jyldan jylǵa damý ústinde, bul úrdis jańadan qurylyp jatqan aımaqtyń rýhanııatyn aqsatpaı alyp ketýge tıis. Dana halqymyz «altyn shyqqan jerdi belden qaz» degenindeı buǵan deıin Túrkistan tórinen túlep ushqan Gúlnar Sıqymbaeva, Sáken Maıǵazıev, Jubanysh Jeksenuly, Altynaı Jorabaeva syndy dúldúlder kóp. Bulardyń izin jalǵaǵan qanshama jas daryndar ósip kele jatyr. Bolashaqta túrkistandyqtardyń abyroıyn órge súıreıtin osylar bolady, deıdi sharany uıymdastyrýshylar.
Beken QAIRATULY,
«Egemen Qazaqstan»
