Eńbek jolyn Qaraǵandy qalasyndaǵy memlekettik medısına ınstıtýtyn bitirip, balalar dárigeri bolyp bastaǵan Zeınelqaıyn Aıtbaeva búginde jas dárigerlerge jol basy, óz qatarynyń ortasy desek artyq aıtqandyq emes. 1971 jyldan Maıqudyqta ornalasqan № 3 Balalar aýrýhanasynda jáne № 2 Balalar emhanasynda balalar dárigeri bolyp eńbek etip kele jatqan onyń tájirıbesi men tálimi talaı jandardy ajal aýzynan alyp qalǵany ámbege aıan.
Jemisti bastalǵan jumysy Qaraǵandy oblysy boıynsha densaýlyq saqtaý salasynda joǵary baǵalanyp, 1985-1990 jyldary bir aýyzdan QazKSR Joǵarǵy Keńesiniń depýtaty bolyp saılanýy Zeınelqaıyn Kúlmaǵanbetqyzynyń qoǵamdaǵy iskerlik kelbetin aıqyndaı túsedi. «Qaraǵandy qalasynyń Oktıabr aýdanynda keńes depýtaty boldym. 2004 jyldan beri zeınettemin, el ıgiligine tókken terdiń jemisin kórýdemiz. Búginge deıin qolymyz bos otyrmaı, tájirıbemizdi jas dárigerlerge úıretip, balalardyń densaýlyǵyn saqtaý úshin Astana qalasynda balalar dárigeri bolyp eńbek etip kelemin», deıdi eńbek ardageri Z.Aıtbaeva.
Ol aǵymdaǵy jyldyń 16-18 mamyrynda Almaty qalasynda ótken Ulttyq medısına qaýymdastyǵynyń IX bas assambleıasy aıasynda ótken halyqaralyq konferensııasyna shaqyrý qurmetine ıe bolǵanyn aıtady.
Germanııa, Fransııa, Bolgarııa, Qytaı jáne Eýrazııa ekonomıkalyq odaǵyna múshe (Reseı, Qyrǵyzstan, Belarýs jáne Armenııa) memleketterdiń mamandary qatysqan konferensııanyń basty taqyryby tótenshe jaǵdaılar kezinde bolatyn medısınalyq-sanıtarlyq zardaptardy joıý, medısınalyq kómekti shuǵyl uıymdastyrýdyń máseleleri tóńireginde órbidi. Sonymen qatar arnaıy taktıkalyq dárister oqylyp, densaýlyq saqtaýǵa baılanysty kórme uıymdastyryldy. «Onyń barlyǵy Elbasy Joldaýlarynda basa aıtylatyn, halyqtyń densaýlyǵyn saqtaýdaǵy medısına qyzmetkerleriniń úlken jaýapkershiliginen týyndaıdy», deıdi Zeınelqaıyn Kúlmaǵanbetqyzy.
Osy konferensııanyń aıasynda «Ulttyq medısına» qaýymdastyǵynyń «Altyn dáriger» nagradasyna ıe boldy.
«Elbasymyzdyń salıqaly saıasatynyń arqasynda elimizdiń densaýlyq saqtaý salasy júıeli túrde damyp keledi. Qazaqstannyń túkpir-túkpirinde ozyq tehnologııalarmen jabdyqtalǵan jańa medısınalyq mekemeler ashylýda. Bul jetistikterge qosqan kishkentaı da bolsyn úlesimiz baryna shyn qýanamyz», deıdi aq halatty abzal jan.
Jumysta jemisti, otbasynda tabysty bolýy zańdy. 1969 jyly Tólegen Aıtanuly esimdi azamatpen otbasyn qurǵan meıirli medbıke Zeınelqaıyn Kúlmaǵanbetqyzy baqytty ana, adal jar boldy.
Búginde qosaǵymen qońyr tirlik keship kele jatqan jaısań jandar balalarynyń qyzyǵyn kórip, olardy da adaldyqqa, adamgershilikke, ómir tazalyǵyna, ádeptilikke baýlyp keledi.
Mıras ASAN,
«Egemen Qazaqstan»
