Nursultan Nazarbaev «Jasyl el» jastar jasaǵynyń ókilderimen birge elordanyń jasyl aımaǵyna aǵash otyrǵyzyp, tabıǵatqa 150 qyrǵaýyl ushyrý sharasyna qatysty.
Qazaqstan Prezıdenti jastarmen áńgimelesý barysynda «jasyl beldeý» elordany shańdy daýyl men qarly borannan qorǵaý úshin tabıǵı tosqaýyl retinde jasalǵanyn eske saldy.
– Orman – naǵyz tabıǵı baılyq ári qolaıly tirshilik ortasyn saqtaýdyń mańyzdy tetigi. Orman-toǵaı qaladaǵy aýany tazartyp, aýa-raıyn jumsartýǵa septigin tıgizedi, – dedi Elbasy.
Sonymen qatar, Memleket basshysy Astananyń «jasyl beldeýiniń» qazirgi jaǵdaıy men ony ári qaraı damytý máseleleri jóninde keńes ótkizdi.
Jıynǵa Prezıdent Ákimshiliginiń Basshysy Á.Jaqsybekov, Premer-Mınıstrdiń orynbasary – Aýyl sharýashylyǵy mınıstri О́.Shókeev, Astana qalasynyń ákimi Á.Isekeshev jáne Aqmola oblysynyń ákimi M.Myrzalın qatysty.
Qazaqstan Prezıdenti 20 jyl ishinde Astana tóńireginde tabıǵat pen qala kelbeti úndestik tapqan biregeı ekojúıe qalyptasqanyn atap ótti.
– Qala ishindegi «jasyl beldeýdiń» aýmaǵy shamamen 15 myń gektardy qamtıdy. Elordanyń úlgisimen búkil Qazaqstanda aǵash otyrǵyzý qarqynyn arttyrǵan jón, – dedi Nursultan Nazarbaev.
Nursultan Nazarbaev «jasyl beldeýdiń» jáne «Shortandy-Býrabaı» shıpajaı aımaǵynyń orman-toǵaılaryn qosý jónindegi aýqymdy jumys aldaǵy jyldary jalǵasatynyn aıtty. Atap aıtqanda, Astana-Qaraǵandy jáne Astana-Shortandy tas joldarynyń boıyndaǵy bir myń gektardan astam jerge aǵash otyrǵyzylatyn bolady.
Jıyn barysynda Aýyl sharýashylyǵy vıse-mınıstri E.Nysanbaev Nursultan Nazarbaevqa 1997 jyldan beri aǵash otyrǵyzylǵan aýmaqtyń jalpy kólemi 83 myń gektardan asqany, sonyń ishinde bıyl orman alqaby 5,5 myń gektar jerge kóbeıgeni jóninde baıandady.
О́simdik qorǵaý jáne karantın ǵylymı-zertteý ınstıtýtynyń dırektory A.Saǵıtov ormandy zııankesterden qorǵaý jáne otyrǵyzylǵan aǵashtar tamyrlanyp ketý úshin qabyldanyp jatqan sharalar jóninde aıtty.
Keńes qorytyndysy boıynsha Memleket basshysy Aýyl sharýashylyǵy mınıstrligine, sondaı-aq Astana jáne Aqmola oblysy ákimdikterine elorda turǵyndary men qonaqtarynyń demalys oryndaryn uıymdastyrý úshin jasyl aımaqty odan ári damytý jáne orman alqabyn paıdalaný jóninde birqatar naqty tapsyrma berdi.
