Oblystyq máslıhattyń otyrysynda óńirde júrgizilgen jumystardyń aralyq nátıjeleri sarapqa salyndy. Jıynǵa oblystyq basqarmalar basshylary, ekinshi deńgeıdegi bankterdiń ókilderi qatysty. Oblys ákiminiń orynbasary Qanat Ydyrysov respýblıkalyq bıýdjetten 2019-2021 jyldarǵa arnalǵan turǵyn úı qurylysyna bólinetin qarjy esebinen «7 – 20 – 25» baǵdarlamasy boıynsha ınjenerlik kommýnıkasııa qurylysyna jospar jasalǵany týraly habardar etti.
Elbasynyń basqa bastamalary boıynsha da belsendi jumys júzege asýda. Esepteýler boıynsha oblystaǵy eńbekaqysy tómen 22 myń jumysshyǵa eńbekaqysyn kóterý úshin salyq azaıtylatyn bolady. Stýdentterge arnalǵan jataqhanalar salý tetikteri ázirlenýde. Qazirgi ýaqytta oblysta 2 870 stýdentti ornalastyrý úshin 11 jataqhana salý qajet. Kókshetaý qalasynyń ákimdigi 4,5 gektardan astam yńǵaıly jer telimin belgiledi. Shaǵyn jáne orta bızneske shaǵyn nesıe berýdi ulǵaıtýǵa qarjy bólý josparlanyp otyr. Sonymen qatar gazben qamtamasyz etýdiń jol kartasy ázirlendi. Arshaly aýdanynda 40 myńnan astam turǵyny bar 17 eldi meken, Selınograd aýdanynda 90 myńnan astam turǵyny bar 7 eldi meken gazben qamtamasyz etilmek.
Depýtattarǵa kezdesýler barysynda «7 – 20 – 25» baǵdarlamasy boıynsha nesıe berý kezinde jas erekshelikteriniń eskerilýine, baǵdarlamanyń aýyldyq jerlerde úı satyp alý múmkindigine, alǵashqy jarnanyń turǵyn úı baǵasynyń 20 paıyzdan asýyna qatysty saýaldar jıi qoıyldy.
Sondaı-aq «7 – 20 – 25» baǵdarlamasy boıynsha oblysta bir ǵana banktiń eki nesıe bergeni aıtyldy. Endi bólimsheler aýqymy keń iri bankterdiń qosylýy arqyly nesıelendirý aıasyn ulǵaıtý qajettigi belgili bolyp otyr. Baǵdarlamaǵa ekinshi deńgeıli jeti bank qatysýy tıis.
Baǵdarlamalyq qujattyń basqa tarmaqtary da jan-jaqty qaraldy. Oblystyq máslıhat depýtattary men memlekettik organdardyń basshylaryna bes áleýmettik bastamany naqty jaǵdaıǵa meılinshe beıimdeýge kómektesetin naqty usynystar aıtyldy.
«Nur Otan» partııasy depýtattyq fraksııa músheleri Ábdimanap Bekturǵanov, Omarhan О́ksikbaev, Zaǵıpa Balıeva men Marat Bopazov bastaǵan bir top Májilis depýtattary Qapshaǵaı qalasyndaǵy Sh.Ýálıhanov atyndaǵy orta mekteptiń janyndaǵy sport alańdarynyń jumysymen tanysty.
Kezdesýge oblystyq máslıhat depýtattary, ákimdik ókilderi, jas sportshylar men mekeme ujymy qatysty. Byltyr mektep janyndaǵy fýtbol jáne voleıbol alańdarynyń, basketbol, vorkaýt, bokserlik alań, dýsh jáne kıim aýystyratyn arnaıy bólmeler salynyp, qoldanysqa berilgen. Sondaı-aq rolık tebetin alań men stadıon aldynda 45 jeńil avtokólikke turaq salynǵan. Oǵan qosa, bıyl jańa partııalyq joba aıasynda qosymsha 14 mln teńge qarajatqa júgirý joldary, basketbol alańdary men fýtbol alańynyń qorshaýyn jasaý josparlanýda. Májilis depýtaty Ábdimanap Bekturǵanov sport alańdaryn qaıta jańǵyrtý jumysy, odan bólek stýdentterdiń ystyq tamaqpen qamtylýy, olardyń jataqhana máselesiniń sheshilýi halyq qalaýlylarynyń nazarynan tys qalmaıtynyn aıtyp ótti.
Atyraýǵa arnaıy issaparmen kelgen Májilis depýtaty Baqtııar Máken Dına Nurpeıisova atyndaǵy mýzyka kolledji jataqhanasynyń qurylysymen tanysty.
Taıaýda paıdalanýǵa beriletin 100 oryndyq jataqhanada oblystyń shalǵaı aýdandarynan kelgen stýdentter ornalasatyn bolady. Kolledj dırektorynyń orynbasary A. Súndetqalıevanyń aıtýynsha, byltyrǵy oqý jylynda 217 stýdenttiń 116-syna jataqhana jetispeýshiligi týyndaǵan. Zamanaýı úlgide salynyp jatqan ǵımaratta stýdentter úshin barlyq jaǵdaı qarastyrylǵan. Aıta ketý kerek, Elbasynyń bes áleýmettik bastamasy aıasynda Atyraý oblysynda stýdentterdiń jataqhana máselesin sheshý maqsatynda birqatar sharalar qolǵa alynǵan. Mysaly, «QazTransOıl» AQ-tyń batys fılıaly kompanııaǵa qarasty 700 oryndyq jataq-
hanany H.Dosmuhamedov atyndaǵy Atyraý memlekettik ýnıversıtetine syıǵa tartyp, qazir atalǵan oqý orny boıynsha jataqhana máselesi tolyq sheshildi. Al Atyraý ınjenerlik-gýmanıtarlyq ınstıtýty stýdentteriniń jataqhanaǵa degen suranysyn qamtamasyz etý maqsatynda bıyl arnaıy jer telimi bólinip, kelesi jyly qurylys jumystary bastalmaq. Parlament depýtaty Baqtııar Máken qurylys nysanyn aralap bolǵan soń, jastar men jastar uıymdarynyń basshylarymen kezdesti.
Daıyndaǵan
Venera TÚGELBAI,
«Egemen Qazaqstan»
