Erekshe lager elordamyzdyń 20 jyldyq mereıtoıymen tuspa-tus kelgen aýdannyń 90 jyldyǵy aıasynda Shabanbaı bı aýylynyń irgesindegi Qyzylaraı taýynyń kórki kóz tartatyn tusynda ashyldy.
«Jas týrıst» shatyrly lageriniń maqsaty – óńirdiń tarıhı-mádenı muralaryn óskeleń jastarǵa nasıhattaı otyryp týrızmdi damytý. Balalar munda jaı demalyp qana qoımaı, ásem tabıǵat aıasynda densaýlyǵyn nyǵaıtady, qorshaǵan ortany tanyp, eńbekti súıýge baýlıtyn is-sharalarǵa qatysady. Týǵan jerdiń tabıǵatyna súısinip, topyraǵyna aýnap ósken balanyń boıynda eline, jerine degen súıispenshilik, otanshyldyq rýh aıryqsha bolary anyq.
Demalys ornynyń ashylýynda aýdan ákimi Saltanat Ábeýova jınalǵandardy lagerdiń ashylýymen quttyqtaı kele, osyndaı ıgi isti qolǵa alyp, balalardyń jazǵy demalysyn qyzyqty ótkizýge jaǵdaı jasaǵan mektep ujymyna, aýdandyq bilim bólimine alǵys bildirdi. Aýdan basshysy Elbasynyń «Rýhanı jańǵyrý» baǵdarlamasynda ishki týrızm mádenıetin damytýǵa mańyz bergenin atap ótti. Osyǵan saı qazirgi kezde túrli baǵdarlamalar qolǵa alynýda, onyń aıasynda Aqtoǵaı aýdanynda da naqty is-sharalar júzege asyrylyp jatyr. «Jas týrıst» balalar lageri – sonyń bir kórinisi.
Jıynǵa qatysqan oblystyq týrıstik klýbtyń dırektory, sport sheberi Sergeı Kıstanov ta jazǵy demalystyń sátti ótýine tilektestik bildirdi.
Atalǵan lagerde aýdan boıynsha 13 mektepten 15-16 jas aralyǵyndaǵy jasóspirimder demalady. Úsh aýysymda barlyǵy 90 oqýshyny qamtý kózdelip otyr.
Erkebulan AITJAN
Qaraǵandy oblysy,
Aqtoǵaı aýdany
