Aqtóbelik balaqaılar oblyspen tanysýdy Temirtaý qalasynan bastady. Qonaqtar tarıhı-ólketaný murajaıynda, Nursultan Nazarbaev oqyǵan Qaraǵandy memlekettik ındýstrıaldy ýnıversıtette, «Vostok» saıabaǵynyń qysqy baǵynda boldy. Sonymen qatar balalar úshin Samarqan sý qoımasynda serýen men «Janar» meıramhanasynda túski as uıymdastyryldy.
Budan keıin balǵyn saıahatshylar Dolınka kentindegi saıası qýǵyn-súrgin qurbandaryn eske alý murajaıyn aralap kórdi. Munda balalar túrli jádigerlermen tanysyp, Karlag oqıǵalary týraly áńgimelerdi tyńdady.
– Bul kún kóptegen qyzyqtarǵa toly boldy. Maǵan barlyǵy unady, ásirese saıası qýǵyn-súrgin qurbandaryn eske alý murajaıy muńdy sezimge bóledi, – dedi óziniń alǵan áserimen bólisken aqtóbelik oqýshy Aqerke Tolybaeva.
Al Aqnur Nurlybekova esimdi qonaqqa Samarqan sý qoımasynda ótken sýdaǵy serýen unaǵan eken.
– Temirtaýdaǵy tarıhı-ólketaný murajaıynda men kóptegen málimetterdi bildim. Onda biz qazaq halqynyń tarıhy týraly syr shertetin tarıhı jádigerlerdi tamashaladyq. Sonymen qatar maǵan Temirtaýdaǵy Samarqan sý qoımasy qatty unady, ol jer óte ásem eken, – dedi Aqnur Nurlybekova.
Senbi kúni Aqtóbe oblysynan kelgen delegasııa Qarqaraly aýdanyna bardy. Onda qonaqtardy fleshmobpen jáne konserttik baǵdarlamamen qarsy aldy.
– Qarqaralyǵa qosh keldińizder! Qarqaraly – ol ásem tabıǵat, oqıǵa-ańyzdarǵa toly tarıh, osy jerden kóptegen batyrlar men sheshender, aqyndar men jazýshylar shyqqan. Búgin sizder Abaıdyń ákesi Qunanbaıdyń turǵyzǵan meshitinde bolyp, taý basyna shyǵasyzdar. Bul kún qyzyqqa jáne oqıǵalarǵa toly bolady, – dep qarsy aldy qonaqtardy Qarqaraly aýdany ákiminiń orynbasary Saılaý Álıuly.
Qarqaralyda balalar Qunanbaı qajynyń meshitinde, ólketaný murajaıynda bolyp, Mádı Bápıulynyń eskertkishin kórdi. Taýǵa shyǵyp, «Úsh úńgir» týrıstik alańyna baryp, Qarqaraly memlekettik ulttyq tabıǵı parkin aralap qaıtty.
– Maǵan bári de óte qatty unady, ásirese taýǵa shyǵyp, ulttyq saıabaqpen tanysqanymyzǵa qýanyshtymyz. Biz onda buǵylardy, qoıandardy jáne tasbaqalardy kórdik. О́kinishke qaraı bızondardy kóre almadyq, biraq men olar týraly ınternetten oqyǵan bolatynmyn. Erkim bolsa, osy jerde mekendep qalar edim, – dep rııasyz kúlimdedi qonaq bala Aıǵanym Janbolatova.
– Qarqaralynyń tabıǵaty óte ásem eken – aǵashtary da, taýlary da. Osynda taǵy kelip, barlyǵyn taǵy bir márte aralap shyqqym keledi, – dedi qurbysynyń sózin quptaǵan Aqerke Tolybaeva.
– Bizdi barlyq jerde tamasha qarsy aldy. Baǵdarlama óte qyzyqty boldy, biz Temirtaýda, Karlag murajaıynda, tipti taý ishinde de bolyp qaıttyq. Qarqaralyda alǵashqy adamdardyń úńgirinde boldyq, ol keremet eken. Qaraǵandy oblysy – óte qyzyqty jáne ásem óńir. Mende tek jaǵymdy áserler ǵana qaldy, – dedi aqtóbelik ulan Nurbek Mysıev.
– Úsh kún lezde óte shyqty. Men Qaraǵandy oblysy týraly kóptegen maǵlumatpen tanystym. Ásirese Qunanbaı qajynyń meshiti esimde qaldy. Aqtóbege oralǵan soń, ata-anam men dostaryma barlyǵyn aıtyp beremin, – deıdi Aqmarjan Amanbek.
Sondaı-aq ol delegasııa quramyndaǵy barlyq balalardyń atynan Qaraǵandy oblysyndaǵy aksııa uıymdastyrýshylaryna jyly lebizderi men qushaq jaıa qarsy alǵandary jáne qyzyqty baǵdarlama ázirlegenderi úshin shyn júrekten alǵys aıtty.
– Qaraǵandy oblysynyń ákimdigine, óńirdegi biz bolǵan qalalar men aýdandardyń bilim basqarmasy men bilim bólimderiniń basshylyǵy men qyzmetkerlerine alǵysymyzdy bildirgimiz keledi, – dedi Aqtóbe oblysynyń delegasııasy jetekshileriniń biri Baǵdagúl Tilegenova. – Barlyqtaryńyzǵa ekskýrsııalar, qyzyqty baǵdarlamalar uıymdastyryp, erekshe-kóńil kúı syılaǵandaryńyz úshin rahmet!
Ekskýrsııa kezinde Aqtóbe oblysynan kelgen delegasııanyń qaýipsizdigine erekshe mán berildi. Úsh kún boıy olar mingen kólikti oblystyq IID Jergilikti polısııa qyzmetkerleri qanatynyń astyna aldy.
Endi eki aptadan keıin respýblıkalyq ólketaný aksııasy aıasynda Qaraǵandy oblysynan 40 bala Aqtóbe oblysyna baryp qaıtady.
Qaırat ÁBILDA,
«Egemen Qazaqstan»
Qaraǵandy oblysy
