«Abaı salǵan dara jol» dep atalǵan oıynǵa qatysatyn 4 top qalalarda ornalasqan birneshe beketke baryp, aqyn týraly suraqtarǵa jaýap berý arqyly jasyryn óleńdi alǵashqy bolyp tabýy kerek boldy. Oıyn sońy aımaqtardaǵy kitaphanalardyń birinde jeńimpazdardy marapattaý men aqynnyń ómiri men shyǵarmashylyǵyna arnalǵan keshke ulasty.
Astana qalasynda jarys «Nur Otan» partııasynyń Astana qalalyq fılıalynyń ǵımaratynan bastalyp, eń sońǵy beket №5 balalar kitaphanasynda aıaqtaldy. Kvest barysynda qatysýshylar matematıkalyq esep sheshti, qala kóshelerin aralap kartada kórsetilgen beketterdi izdedi, Abaı týraly túrli suraqtarǵa jaýap berip, aqyn týraly bilimderin ortaǵa saldy.
Qatysýshylardyń aıtýy boıynsha oıyn formatynda ótken jarysta olar aqyn týraly bilimderin tereńdete túsken. «Basqa toptarmen básekelestik jarysty qyzdyra tústi», deıdi qatysýshylardyń biri. Oıynnyń sońǵy núktesi kitaphanaǵa birinshi bolyp kelgen jáne jasyrylǵan óleńdi durys tapqan top jeńiske jetti. Elimizdiń túkpir-túkpirinde jastar uly Abaıdyń týǵan kúnin osylaısha atap ótti.
